Shwegu Mali hka kau hta nga ai mare kahtawng hkan na mung shawa marai 30 jan hpe Myen hpyen dap ni rim woi mat ai lam chye lu ai.
August praw 8 ya, Shwegu lahta Shwegu Lay mare, Shwe Bung Thar mare hte Ngapauk Wa mare maga de, Jak li 2 hpyen n gun 30 daram hte du wa na, dai ginra mung shawa marai 30 jan hpe rim woi mat ai re nga, amyushayi langai KNG shiga dap de tsun dan wa ai re.
“shan hte gaw jahpawt jau dik lung wa na, wa wang rim mat ma ai. tsawm ra mi lawm mat ai, shanhte jawn lung wa ai jak li hte woi mat ma ai” nga nna tsun dan ai re.
Myen hpyen dap ni ya na zawn, mung mare masha ni hpe rim woi mat wa ai lam gaw, Mandalay na laknak machyu pala hte lu sha htaw lung wa ai hka sang hpaw li 9 hpe shim zawng ya lu hkra, mung shawa hpe hpyen ninggang shatai jai lang na matu rim woi mat ai re nga, mung masa yu maram ai ginra masha langai tsun tawn ai re.
“Ya shan hte gaw Shwegu kaw na Manmaw de lung wa lu na matu, Shwe Bung Tar, Shwegu Lay mare ni hpe lai di ra ai le. dai mare ni hpe lai di na matu dai mare na mung shawa ni hpe ninggang shatai da yang, n gwi hkap gap sat ngu ai yaw shada ai lam hte rim woi ai lam mai byin ai.” nga tsun maram da ai re.
Dai hka sang hpaw li 9 hpe mung shawa rawt malan dap maga de na mali hka lam ding yang hkap shing la gasat ai hta, hkra machyi ai lam ni mung nga wa ai majaw, Hti Chyaik hkyuk htawng kaw na, bawng masha marai 50 ram hpe htaw woi lang nna, hpyen ning gang shatai wa sai re.
Myen hpyen dap ni gaw, dai hka sang hpaw li n tsa na laknak kaba ni hte, mali hka kau mayan na mare kahtawng ni de gap shadam bun ai majaw, mung shawa n kau hkala hkrum ai ni mung nga ai hpe chye lu ai re.
Ya ten mali hka kau mayan na mung mare masha ni yawng hprawng yen taw nga ra ai re lam matut chye lu ai.
