Hpakant Nammaw hte Tamahkan mare lapran na Kasen Bum hpe Myen hpyen dap ni, August praw 8 ya shana maga hkying 3 daram aten, Jet Fighter n bungli 2 hte bawm wa jahkrat bun kau da ai lam chye lu ai.
Kasen bum Myen hpyendap post hpe KIA Dung 6 ni August praw 7 ya jahpawt jau sa htim gap gasat zing kau ai hpang, ya na zawn n bungli hte bai wa gap ai lam re nga, shawng lam magam gun langai KNG shiga dap de ya na zawn tsun dan ai re.
“mani hpawt kasen bum hpe anhte maga na ni sa lu gap gasat zing kau ai le, dai kaw shan hte Myen ni tsawm ra sum machyi mat ma ai. dai majaw n bungli sa na re ngu hpe chye da chyalu re. dai na de hkying 3:00 kaw kalang, 3:05 kaw kalang, lahkawng lang wa jahkrat kau da ma ai. anhte maga tau hkrau hkyen lajang shajin da sai majaw hpa n ra ai. mani hpawt padang dip zing la lu ai laknak machyu pala mung mawdaw hku lu htaw la sai.” nga tsun dan ai re.
Dai na maga nbungli hte rai n sa gap shi yang, Hpakant Kyauktwintawng hta dap jung ai Myen hpyen dap ni kaw nna, Nammaw hte Kasen Bum maga laknak kaba 120 mm ni hte ding yang gap bun ai lam chye lu ai.
Mani hpawt Kasen bum Myen hpyen dap hpe sa htim gap gasat ai hta, Myen hpyen dap maga na laknak machyu pala alaw a lam lu zing madu la ai hte, si sum ai masha mung law wa ai rai nna, jahkrung lu rim la ai ni mung nga ai re hpe chye lu ai.
Ya ten dai dap shara hpe KIA maga a tsawm sha matut makawp maga da lu ai rai nna, Myen hpyen dap ni shani tup ngu na laknak kaba gap bun taw nga ai hte dai ginra hta hpyen masa matut shaja hkat taw nga ding yang re lam chye lu ai.
