Myitkyina Manmaw lam kaba n tsa, July 25 ya, lani mi laman shara 3 hta Myen hpyendap hte KIA majan byin ai lam chye lu ai.
July 25 ya jahpawt hkying 8 ram aten, Mali Yang kaw nna Dabak de sa wa ai Myen hpyen hpung ni hpe KIA Masat (1) Dap Nawng Daju ni Bawm hte hkap gasat bun wa ai lam chye lu ai.
Dai hpang shani ga-ang hkying 12 daram aten, Dawhpum Yang lahta Dingga hte Hkala mare lapran hta Mung Myen hpyen dap hte KIA Dung 19 ni lapran hkying hkum chyen mi daram laja lana gap gasat hkat wa ai re lam shawng lam hpyen shi sawk ni kaw na chye lu ai re.
Shana maga hkying 2 chyen daram aten hta mung, Katsu Dabak hta dung ai Myen hpyen dap ni Japu mare maga de hpyen garum sa wa ai hpe KIA masat (1) Dap Nawng Daju ni Sama lam numshe lahta kaw hkap shing la gasat dat ai kaw na Majan laja lana gap gasat hkat wa ai lam chye lu ai.
Ya na zawn, Myen hpyen dap hte KIA dap larpan majan laja lana gap gasat hkat wa ai majaw, Gara, Dabak, Katsu mare hkan na mung mare masha ni bum yi galaw sha ai lam hta, shimlam a matu hkrit tsang taw nga ra ai re lam chye lu ai.
July 24 ya shana maga hkying 1 daram aten hta mung, Shwe Nyaung Pin Myen hpyen dap kaw na, Nam San yang mare maga de, nam lam hku na hpyen shamu shamawt htu shadut shang wa ai Myen hpyen n gun 100 daram gaw, bum yi galaw sha nga ai mung mare masha ni hpe, jahkrit sharim ai lam ni galaw wa ai nga, Gara yang ginra masha langai KNG shiga dap de tsun dan ai re.
Lai wa sai bat hta mung Myen hpyen dap ni hpyen shamu shamawt htu shadut wa ai ten, Japu mung mare masha marai 3 rim hkrum wa sai re.
