Shwegu ginwang, Malihka Sinna maga Kyaukgyi mare de lung wa ai Myen hpyen hpung hta, Myen hpyen dap hpe madi shadaw ai mung shawa marai 30 daram hpyen hking dagraw let, shang lawm taw ai lam chye lu ai.
July 23 ya shana maga, Shwegu kaw nna dKyauk Gyi mare maga de, hpyen n gun 80 daram hte shamu shamawt hkawm taw ai hta, Pyosawhti (ပျူစောထီး) na marai 30 daram lawm ai nga, dai ginra na PDF lit nga ai ni KNG shiga dap hpe tsun dan ai re.
“Ya lung mat ai hpyen hpung gaw, mi shawng hta n gun 80 ram nga ai. Shwegu de bai du wa ai gaw 50 ram sha du mat ai. marai 30 ram gaw si ai ga rai nga ai. Ya kalang bai shang wa ai ten gaw, shan hte hpe madi shadaw ai Pyosawhti marai 30 ram hte hpawn Hpyen n gun 80 ram hte bai htu shadut wa ai rai nga ai.” nga dai rawt malan magam hta shang lawm nga ai ginra masha langai tsun dan ai re.
Ya dai Myen hpyen hpung hte lawm mat wa ai Pyosawhti marai 30 daram hta law malawng gaw Shwegu mare kata na rai nna, Tawpung mare na USDP Party hpung shang ramma nkau mung lawm ai hpe chye lu ai.
“Shanhte hpe sinat gaw rai n jahpai shi ai, htaw ra kaw du yang jahpai na kun chyawm gaw n chye ai. anhte maga na mung la yu taw nga ai. တောပုန်း mare gaw USDP party hpung shang masha law ai majaw, dai mare na ramma ni lawm mat ai nga.” nga myit chyaw mu ai ginra masha langai KNG hpe matut tsun dan ai re.
Ya ten Tawpung mare hta dum nta hting gaw 250 daram nga ai kaw na, law malawng Myen hpyen dap hpe madi shadaw ai ni re majaw, dai ginra hta shamu shamawt hkawm nga ai hpyen hpung shagu ngu na hta Myen hpyen dap hpe madi shadaw ai mung shawa ni lawm ai re hpe chye lu ai.
Shwegu Sinpraw Sinna lahkawng maga de, Myen hpyen dap jahkring hkring htu shadut wa ai majaw, ginra daju PDF dap ni hte jahkring hkring majan byin nga ai re.
Myen hpyen dap Hk.L.Y (10) dap ni lai wa sai July 20 ya shani hpyen shamu shamawt hkawm ai ten, PDF ni drone hte bawm 2 lang jahkrat bun ai majaw, Myen hpyen dap maga si hkala lam nga wa ai hpe chye lu ai.
