Wunpawng Mungdan Shanglawt Asuya, KIO Ginjaw Laiza makau Nam San Yang mare kaw Myen hpyendap ni htu shadut lung wa ai majaw dap lahkawng lapran majan ding yang byin nga ai re.
July praw 4 ya shani Gasat poi byin ai shaloi Laiza lawk 5 kaw nga ai Su Bu Gyi Modo Workshop kaw na Salang Awng Min asak 50 ning gaw, Manmaw de na lung wa ai hta Nam San Yang mahkrai pawt kaw Myen hpyen dap ni hkap gap ai majaw, lahkra maga lagaw magyi kaw gap hkra nna, hkala sawng ai majaw, Laiza Mungshawa tsi rung kaw tsi tsi hkamla nga ai lam chye lu ai.
Manmaw lam hku lung wa ai Myen hpyen mawdaw 10 hpe dai jahpawt sha Dawhpum lahta Hka La mare hta KIA dap ni hkap gasat ai lam nga ai re.
Myen hpyen dap ni gaw Nam San Yang mare makau kaw nga ai Dum Bang Bum hte Ban Dawng lam numshe kaw dap jung lu hkra, shakut nga ai gaw laiwa sai June 16 ya shani kaw re lam, ginra masha ni tsun ai re.
Bai lahkawng maga hpyen masa shaja hkat ai majaw, Myen hpyen dap ni kawn Manmaw hte Myitkyina lam hpe pat da ai lam ginra masha ni tsun ai.
Nam San Yang mare hpyen yen mungshawa ni gaw 2011 ning kaw Myen hpyen dap hte Wunpawng mungdan Shanglawt Hpyen Dap ni gasat poi bai byin wa ai majaw, hpyen koi yen nga ai kaw na 2018 ning hta tinang mare buga de bai wa nga ai re.
KIO ginjaw makau hta ya na zawn hpyen masa shaja hkat taw sai majaw, Laiza Ginwang kaw nga ai mungshawa ni sadi maja let hkawm sa na matu, KIO uphkang rung ni ndau da ai re.
