Manje Ginwang, Munghkawng hpyenyen dabang kaw nna, byin mai ai ladat hte tinang hkrai bawm hkyep ni jasan la nna, dum nta wa nga taw sai, Laika Zupja mare masha ni gaw, ya ten dum n ta n lu ai mayak hte byin mai ai hku matut lai di ra nga ai lam chye lu ai.
Dum n ta wa sai, shata 2 daram na wa tim, gara kaw na kade a madi shadaw ai lam mung nlu shi ai majaw, dum n ta n lu ai ni, yak tim yak ai hku lai di ra nga nna, malu masha nlu ai mayak ni matut hkrum sha nga ai lam, Laika Zupja mare na ginra masha wa KNG shiga dap hpe n dai zawn tsun ai.
“Nkau gaw, Moga ginsum rau naw rawng, nkau gaw nta naw mai rawng ai tinang a jinghku nta hkan naw shingbyi nga nang re ni, nkau gaw mamdum mamka hkan, mai byin ai hku machyut machyat rai naw nga shajang nga ga ai.” nga nna tsun ai re.
Lai wa sai May 10 ya shani, tinang ladat hte tinang, Munghkawng hpyenyen dabang kaw nna, Laika zupja mare de dum n ta wa sai rai nga ai.
Dum n ta wa ai hpang, mare masha ni tinang dinghkrai ladat hte mare kata kaw nna, n kapaw ai, hkrat ngam ai, bawm chyen, bawm hkyep ni hpe hta jasan la wa ai lam chye lu ai.
Dum nta wa ai ndai hpyenyen ni a matu, bawm jasan ai lam hpe kadai lit la na galaw ya ai lam nnga ai rai nna, mare masha ni hta jasan la ai bawm ngam ni, June htum du hkra 10 jan ram hta jasan la lu sai hpe chye lu ai.
“Yak ai gaw ya law law se wa ai majaw, yi sun hkau na mung, lu madam ai ni she bai lu madam re majaw, lu sha ni grai yak taw nga ga ai. Lu hka, lang hka mung bum de na shalen la ai hka sha pawng lang nna, n law lang le. Nkau na hka htung ni gaw nau na mat na, hka lasa di hkyet mat ai. Mai byin ai hku chyawm lang rai nga ga ai.” nga nna matut tsun dan ai.
Ya na zawn, laika zupja mare masha ni dum n ta wa lu na matu hte, mare kata nga ai ten majan nhpan ni nbyin na matu, Myen hpyendap hte Shanglawt dap lahkawng maga de laika bang hpyi shawn da ai lam chye lu ai.
Ya ten, ma ni a hpaji jawng hpe tinang dinghkrai gumhpraw shinggyin la nna, lawu tsang jawng hpaw taw ya tim, mayak mahkak hte matut tawt lai taw ai lam matut chye lu ai.
Laika zup ja mare gaw, Munghkawng kaw nna deng 3 ram tsan ai shara e nga ai rai nna, Myen hpyendap ni, Manje- Munghkawng- Majigung de lai lung shagu, majan byin ai shara rai nga ai.
