Shiga

Nanghpam shadu shapraw ai tsi ni hpe KIA nat jahten

Mungmyit Sinli, Muse hte Namhkam mawdaw lam lapran, Kani Ya hpyen shadu ai kaw jai lang ai, Acid Tsi hpan law law htaw shalai lung wa ai maw daw 3 kaw nna, langai hpe KIA dung 9 ni kawn hkap rim nna jahten kau ya sai re.

KIA Dapba 6, dung 9 ni hkap rim ai, dai Kani- Ya hpyen shadu na matu, Chemical tsi hpan ni hpe htaw tawn ai mawdaw gaw Ta-ang TNLA rawt malan hpung a re lam KIO Ginjaw shiga dap lit hkam Dukaba Nhpang Naw Bu KNG hpe n dai zawn tsun shateng ai re.

“n dai dung 9 ni hkap rim la lu ma ai nga, ya ten du hkra gaw TNLA ni na re nga na tsun da ma ai. Hpa majaw nga yang maw daw kaba 3 re hta na 2 gaw lawt mat ai. Dai lawt mat ai 2 gaw balawng dap sinli bum maga de shang wa sai da. Langai sha lu rim ai hku rai nga. Balawng hpyenla ni hku nna mung, n dai maw daw hpe dat ya na matu tsun ai lam ni mung nga ai. Dai majaw TNLA ni na re lam gaw sak se nga sai hku rai nga.”

Lai wa sai March 2 ya shana hkying 9 ram aten, Kuthkai- Namhkam makau, Je Lan mare na, Zaimaw Bum de htaw shalai lung wa ai kaw, lam daw mi hta KIA maga hkap rim la lu ai re lam chye lu ai.

Dai hpang, March 4 ya shani gaw tsi ni hpe wan nat jahten kau nna, Mawdaw hpe chyawm bai jaw ai lam matut chye lu ai re.

Muse, Namhkam, Kuthkai, Namhpakka dai ginra mayan, Ka-ni ya hpyen, Nanghpam lu sha ai ni hte dut ai ni hpe, buga ginra masha baw sang ni ginrun nna, 2014 kaw nna Pat jasan magam bungli dingyang galaw nga ai re.

Dai hta TNLA maga mung, ginra kata hkan, Ka-ni nanghpan the seng nna, bungli shang, jasan rim ahkyak la ai lam ni galaw ai lam, PSLF/TNLA kaw nna dingyang n dau ai lam nga ai re.

Ratimung, ya na zawn, Ka-ni di bai dun nna, galaw ai lam gaw, pat jasan bungli hta grau hkrat sum na zawn, mung shawa hpe grau hkra machyi shangun ai lam, Namhpakka ginra Pat jasan hta tsap nga ai mung masha langai KNG tsun ai re.

Ndai Lam the seng nna, TNLA tsun shaga ahkaw ahkang nga ai Dukaba Ta Aik Chyaw hpe KNG kaw nna matut mahkai raitim, hkrum shaga lu ai lam nnga shi ai re.

Mungmyit Sinli ginra hta, ginra masha myu baw sang ni the lak nak hpai rawt malan ni jawm nna, Ka-ni Nanghpam pat jasan bungle hpe dingyang galaw nga ai rai nga ai.

Related Articles

Leave a Reply

Your email address will not be published. Required fields are marked *

Back to top button