Hugawng Lido lam, Jahtu Zup mare hta Myen hpyen dap n pu, Pyi Thu Tsit hpyen hpung ni, dap ning nan langai bai kahtap hpaw jat nna, Shagyit masum hte shara jahkrat gumhpraw hta sha taw nga ai lam, ginra masha ni kawn chye lu ai.
Lai wa sai June shata, KIA Dung 14 ginra de sa ai lam kaba 4 hte hpe pat kau ai hpang, Jahtu Zup mare makau dap ningnan hpe bai hpaw jat nna, lam bai hpaw ai hte gumhpraw hkap hta sha nga ai re lam KNG shiga dap de ya na zawn tsun ai.
“Shan hte gaw, Dung 14 de sa ai lam kaba ni hpe shata mi gan pat da ai ten, Kai Taw maw makau hta Pyi Thu Tsit hpyen dap ningnan langai hpe hpa sinat mung n shangoi ra ai sha apyaw sha hpaw jat da ma ai. Ya dai kaw dung na Ja maw de sa wa, pru wa ai ni hpe gumhpraw hta sha pyaw taw nga ma ai”, nga Jahtu Zup ginra masha tsun ai re.
Ya ten Jahtu Zup ginra makau grup yin gara de pru shang hkawm sa tim, Pyi Thu Tsit shagyit ni kaw gumhpraw bang nna she lai ra taw ai majaw, mung shawa ni a matu yak hkak taw nga ai lam ginra masha ni matut tsun dan ai re.
Ya gumhpraw hta sha taw nga ai shara ni gaw, Jahtu Zup mahkrai n tsa, San Pya mare kata hte Kai Taw maw sa wa lam shara hkan hpaw tawn ai rai nna, masha langai lap 5000, Sengke langai 5000 hte Mawdaw langai 10000 lahta jaw bang taw ra ai lam matut chye lu ai.
Lai wa sai June shata hta KIA Dung 14 ginra na Ja Maw de sa ai lam ni yawng hpe gan pat kau ya ai rai nna, July praw maga de bai hpaw dat ya ai hpang, lai sa lai wa ni hpe ding yang gumhpraw hta sha taw ai re lam matut tsun wa ai.
“Nga ai lam shagu hta shan hte dap jung shara la taw ai majaw, shawoi na hta grau na hkawm sa hkawm wa yak hkak mat sai. Shawoi na zawn wang lu wang lang n mai hkawm sa mat ai, galoi mung hkrit maja na sha hkawm sa ra ai, shan hte chyawm shim lam a matu re nga na gaw tsun ai, raitim shan hte nga ai majaw anhte na matu grau shim lam n nga mat ai, anhte hku na mung hkum hkap mu ngu mung n mai sa tsun ai. N kau gaw lekmat galaw na lai hkawm sa ai lam ni mung galaw nga ma ai.”
Ya na zawn Pyi Thu Tsit dap ni kaw na mung shawa ni hpe jahkrit shama gumhpraw hta sha taw nga ai lam ni a majaw, mung shawa ni lam shagu hta yak hkak taw nga ai sha n ga, shim lum lam a matu galoi mung hkrit tsang ra taw ai lam chye lu ai.
Pyi Thu Tsit dap ni dai zawn lai sa lai wa mung masha hte, gun rai htaw mawdaw, Ja Maw hkan na hkawn hta ai hte, Maw de shang ai sau htaw mawdaw ni hkan na hta la ai gumhpraw lani mi Sen 400 ram hta la taw ai rai nna, shata mi Sen hkying kaba hta sha taw ai re lam, jahtu masha ni tsun ai re.
Salang Min Zin Tant woi awn ai Jahtu Zup Pyi Thu Tsit hpyen hpung ni gaw, Myen hpyen dap daru magam zing kau ai hpang kaw na, Jahtu Zup ginra hta hpyen n gun jat nna, ginra shara ni ding yang maden jat taw ai rai nna, hpyen shamu shamawt ai lam ni ding yang nga taw ai nga, ginra masha ni tsun dan ai kaw na chye lu ai.
