Munghkawng buga masha ni, galaw lu galaw sha lam yak hkak wa

Manje, Munghkawng ginra nga, hpyenyen mung shawa ni gaw, mayak lam hpan hkum hkra lapran, dai ning na ladaw hkai n mai, galaw lu galaw sha lu na lam hta, hpyen masa a majaw, hkawm sa hkawm wa shim lam hta dut dang ai mayak hkrum taw ai hpe chye lu ai.

Covid ana hte, Hpyendap daru magam zing kau ai 2 ning jan tup, pru hkawm lam mayak a majaw, Karum ningtum hpe sha machyu let nga ra taw ai hpyen yen ni a matu, dai ning yi,sun,hkau na galaw sha lu na, shakut taw ai raitim, Hpyen masa a majaw, shimlam hta dut dang taw ai n hkan, galaw lu galaw sha na, aten lai mat na myit tsang taw ai lam Munghkawng hpyenyen mung shawa langai KNG hpe n dai zawn tsun ai re.

“Myen ni mung lai wa lai sa, zim sai mi re, n zim ai mi re mung n chye, shanglawt ni mung, hpyen ni lung wa maga nga jang gaw, gap na bai nga, dan re lam ni nga jang gaw, hkrit tsang ra ai gaw dai rai nga, hkawm sa hkawm wah ta, shimlum lam n lu ai daram re nga.Hkauhting hkauna ni yi ni galaw sha nga yang gaw, n dai May shata praw daw de na bungli shang wa ra sai rai nga ai. Ya ten e nhpan ni n lu kum, n pun ni n lu htu, hkran sawm nat ai lam ni n lu galaw rai yang gaw hprang hkrat mat jang lu na ni n lu, hkai n mai n byin dan re byin ai hku rai nga.”

Munghkawng ginra masha ni gaw, mare hte deng 2, 3 ram tsan ai shara hkan, yi, sun, hkau na ni hpe galaw sha let kan bau taw ai ni rai nga ai.

Dai hta ya ten, Myenhpyen dap gaw, Manje the Man maw maga de na dingyang hpyen shamu shamawt, lai wa lai sa galaw taw ai majaw, kan bau bungli lam, mung shawa ni hkawm sa hkawm wa lam hta dut dang taw ai rai nga ai.

Kan Bau bungli galaw sha lam hta myit tsang ra taw ai sha n ga, maga mi de Hpyen yen ni hpe, dinghku kata lang arung arai ni garum ningtum jaw nga ai, wuhpung ni mung dawm wa taw ai majaw, hpyen yen ni mayak lam law law hkrum sha taw ai lam n dai zawn matut tsun ai re.

“ndai hpyen yen kaw mung,htuk lu htuk jaw the seng na mung dawm na zawn bai nga wa, ya anhte gaw anhte rawng ai hpyenyen gawk ni mung hpri hpraw ni waw mat ma, shakum ni waw mat ma, ya marang ni bai htu rai jang, marang mung n shim mat ai daram rai nga, ya galaw lu galaw sha ma wang lu wang lang n lu galaw sha ai ten mung re taw, dai hta ma ni asak kaba ai ni machyi makaw rai yang tsi mawan mari la na Ja Gumhpraw mayak ni dut dang taw ai rai nga.”

Munghkawng hpyen yen ni gaw masha marai hkying lam nga ai sha n ga, garum ningtum ni dep hkap na yak ai shara the Majan masa gahtet wa yang myit tsang ra ai shara kaw nga taw ai hpyenyen langai mung rai nga ai.

Munghkawng mare a sinpraw de deng 10 jan kaw Maji Gung Myenhpyen dap byuhar kawng nga ai rai nna, Myenhpyen dap gaw Manmaw, Manje de na dingyang lai lung shamu shamawt lam galaw nga ai re.

Lai wa sai April shata hta Munghkawng Maji Gung de lai lung ai Myen hpyen maw daw yan hpe KIA dung 27 ni 10 lang jan, hkap gap ai lam ni dingyang galaw wa sai re.

Read Previous

Lamu ga, makau grupyin makawp maga mayu ai ni matu, sumla hkrung kadun shing jawng lamang

Read Next

May 14, KNG Radio

Leave a Reply

Your email address will not be published.