Myen hpyendap Hte KIA Shara 2 Hta Majan Byin

Myen hpyendap hte Wunpawng Mungdan Shanglawt Hpyendap KIA lapran, dai hpawt maga mungdaw kata shara 2 hta majan byin sai re.

Manmaw ginwang daju, Nmawk mare shing gan Lung Ja ngu ai mare makau hte, Danai Lido lam ntsa, Lawa mare makau dai shara 2 hta dai hpawt maga hkying 10 daram aten e majan byin ai rai nga ai.

Nmawk mare daju, Myen hpyen dap Hk M Y 437 dap na, hpyen n gun 100 jan, lagaw lam hte KIA ni nga ai Lung Ja mare maga de lai lung wa ai majaw, KIA Dapba 3 wuhpung ni hkap shing la gasat ai re nga, Lung Ja ginra masha ni tsun dan ai re.

Dai majan hta Myen hpyendap maga si hkala ai lam nga na re nga nna, ginra masha ni maram tsun ai re.

Bai Lido lam ntsa, Lawa mare makau hta mung dai hpawt hkying 10 daram aten hta Myen hpyen mawdaw hpe KIA kaw nna hkap gapaw sai re.

Ndai laman Danai Lido lam de, Myen hpyendap malu masha htaw madaw 40 jan lai lung wa ai majaw, Myen hpyendap kaw nna lam ding yang n gun laba jahkrat tawn let zawng nga ai rai nna, dai hpe KIA kaw nna hkap gap ai lam ni ding yang galaw nga ai re.

Jinghpaw Mungdaw kata ndai laman Majan kaba n nga ai raitim, hpyen shamu shamawt hkawm ai Myen hpyendap hpe KIA kaw nna hkap gap gapaw ai lam ding yang galaw nga ai hpe chye lu ai re.

Read Previous

Lido Lam Mayan Majan Ding Yang Byin Taw Nga

Read Next

Sagaing hte Jinghpaw Mung Jarit de Myen Hpyen N Gun Grau Htu Shadut Taw Nga

Leave a Reply

Your email address will not be published. Required fields are marked *