KIA htim gasat zing madu da ai Lawa Kyuhpyi bum shara de Myen hpyen dap hte Pyithutsit hpyen n-gun kaba hte hpyen man mali hku htu shadut lung wa nna, Nbungli Drone ni hte laja lana bai gap gasat wa ai majaw, KIA dap maga bai hting nut kau da ra mat ai lam, shawng lam hpyen shi sawk ni tsun ai re.
“Mani Hpawt Htim gasat da lu ai Lawa Kyuhpyi Bum de Tai Hpyen maga na Hpyen man 4, Drone, Nbungli, ni kaw na laknak kaba agying gap sharu bun, lagaw dap hku na mung grai htim gasat wa ai majaw, anhte maga na bai gan yen kau da sai,” nga shawng lam hpyen shi sawk hte ni nawn ai ni tsun ai re.
Myen hpyen dap hte Pyithutsit pawng hpawm dap ni gaw, lai wa ai March shata kaw na, Hpakant lam de htim gasat na matu Lawa mare hpe shawng htim gasat hpang wa ai rai nga ai.
Lawa mare de Myen hpyen hpung ni March 25 ya shani du shang shara la nga ai hpe KIA dap maga na 30 ya shani bai htim shagrawt kau lu ai re.
Dai hpang Myen hpyen dap hte Pyithutsit hpyen hpung ni hpyen n gun kaba hte bai htu shadut htim shang wa ai majaw, Lawa mare hpe bai gan yen kau da ya ai rai nga ai.
Lawa mare kyuhpyi bum hta dung ai Pyithutsit hpung ni hpe KIA dap maga na, Mani hpawt May praw 4 ya jahpawt jau htim gasat zing madu kau lu wa ai re.
Mani hpawt KIA htim gasat zing da lu ai Kyuhpyi Bum hpe Myen hpyen dap Pyithutsit pawng hpawm dap ni hpyen man 4, Drone Nbungli hte laja lana htu shadut htim gasat wa ai majaw, KIA dap maga dai na de kaw na bai gan yen kau da ya sai lam chye lu ai.
Kyuhpyi bum hpe htim gasat ai Pyithutsit dap maga na si hkala lam ni law nna, laknak arung arai n kau hpe mung padang dip zing la lu ai lam nga ai nga, shawng lam hpyen shi sawk ni tsun ai kaw na chye lu ai.
Lawa hpyen man maga de htim gasat ai lam hta, Waimaw Pyithutsit, Wara zup Pyithutsit, Mogaung Pyithutsit, ni shang lawm ni htim gasat lawm taw nga ai re.
