Sagaing hte Jinghpaw Mung Jarit de Myen Hpyen N Gun Grau Htu Shadut Taw Nga
Jinghpaw mung jarit, Sagaing ginra Phone hte Internet pat da ai mare kaba ni de ndai laman, Myen hpyendap kaw nna hpyen n gun la ba htaw bang da ai majaw, majan grau kaba wa na hkyen nga ai lam, ginra masha ni tsun ai re.
Sagaing ginra kata KawLin, PinLeBu, WunTu maga de madung tawn nna, Myen hpyendap gaw ginra jasan jaseng galaw ai gabaw hte, Pin Le Bu, Kaw Lin sinna hkran de hpyen n’gun (500) jan nam kata hku nna, ndai laman htu shadut lung wa ai re.
Dai zawn, Myen hpyen dap ni shadut lung wa ai majaw, dai ginra hkan na mare kahtawng 10 jan hprawng koi yen mat ai lam na chye lu ai.
Matut mahkai internet, phone line pat da hkrum ai mare kaba ni hpe madung tawn hpyen n’gun jat nga ai lam hta, grau nna KawLin, WunTu, BanMawk, Pin Le Bu ndai mare kaba 4 hta pyi, Myen hpyen n’gun 2,000 jan du nga sai hpe chye lu ai.
Bai nna Hpyen maw daw ni mung shani shagu shang nga ai lam, dai ginra ndai laman hpyen maw daw 100 jan du nga sai lam chye lu ai. Ban Mawk kawn Pin Le Bu maga de wa ai Shara nam kata kaw mat mat ai re lam mung matut nna chye lu ai.
Sagain Taing kata September (22) ya kawn (27) ya laman Wunpawng Mungdan Shanglawt Hpyendap KIA, PDF hte gasat poi byin ai hta myen hpyen ni marai (70) ram si ai lam nga ai hpe chye lu ai. September (26) ya shani, Wan Be Im kaw hpyen nbungli hte wa gasat ai lam nga ai hpe mung chye lu ai.
Bai October praw 1 ya shani Kathar kaw nna Indaw de wa ai mawdaw hpe KIA hte Katha PDF ni bawm the hkap gasat ai hta Myen hpyendap maga marai 30 yawm htum hkrat sum ai lam NUG asuya makawp maga hkringmang dap kaw nna ndau tawn ai re.
Ya ten, Sagain ginra Internet hte Phone hpe Myen hpyendap kaw nna di da ai majaw, dai ginra Myen hpyen yen ni a ra kadawn lam kata lam hpe tang madun lu na matu yak hkak nga ai re.
Sagaing ginra gaw, Jinghpaw mung de Myen hpyen n gun htaw shalai ai lam hta nga ai re majaw, galoi raitim majan grau kaba mai wa ai lam gin masha ni tsun maram nga ma ai re.
