Majan Byin Ai Lam Nnga tim, Indawgyi Ginra de Nbungli Bawm wa Jahkrat Bun Nga

Myen hpyen dap ni ndai laman, Jinghpaw Mung Indaw Gyi ginra de nbungli bawm wa jahkrat bun taw nga ai lam, ginra masha ni tsun dan wa ai re.

April 22 ya jahpawt jau hkying 2:45 am ten, Na Mawn mare hte deng mi ram tsan ai Sanun Kawng kaw wa jahkrat bun kau da nna, Mana hkying 11 ten daram hta mung, kalang bai wa jahkrat bun kau da ai nga tsun dan wa ai re.

“Mani hpawt jau hkying 2:45 hta Na Mawn mare makau Sanun kawng kaw nbungli bawm wa jahkrat kau da ai, ngut na mana hkying 11 ram hta mung bai wa jahkrat bun ai, an hte Mai Nawng mare hkan na asan sha na ai,” nga ginra masha langai KNG de tsun dan wa ai re.

Dai Sanun Kawng mayan de Myen hpyen dap hte SNA pawng hpawm dap ni lai wa sai April 11 ya jahpawt hta mung hpyen n-gun kaba hte htu shadut htim gasat lung wa ai hpe KIA pawng hpawm dap ni hkap shingla gasat dat ai kaw, Myen hpyen dap maga na sum machyi lam ni law wa nna, bai hting nut mat ai mung rai nga ai.

Majan byin nga ai Indawgyi Sanun Kawng maga de Hopin kaw na mung laknak kaba ni hte gap garum taw nga ai lam, Hopin ginra masha langai mung KNG de matut tsun dan wa ai re.

“Hopin kaw na Indawgyi maga de laknak kaba gap garum taw ai majaw, ndai laman laknak kaba n sen bai na taw ai,” nga tsun wa ai re.

Myen hpyen dap ni kaw na ya na zawn laknak kaba ni gap shadam bun taw ai majaw, mung shawa hkala hkrum ai lam ni mung nga taw ai rai tim, marai gade gara hku hkala ai ngu hpe a tsawm tup hkrak n chye lu ai re.

Laknak kaba a majaw April 22 ya shani Ga lasi baw taw ai mung mare masha nkau hkala hkrum wa ai lam nga ai nga, ginra masha ni tsun ai re.

Ya gap gasat hkat taw nga ai, Sanun Kawng hte Myen hpyen dap ni nga Na Mawn Bum gaw deng 5 daram sha tsan ai rai nna, dai hpawt manap hkying 9 ten daram du hkra laknak kaba ni ding yang ngoi taw ai lam ginra masha ni tsun dan wa ai re.

Na Mawn mare makau grup yin hta sinat kaba matut n di ngoi taw ai majaw, Na Mawn, Shwe Let Pan, Mai Nawng hkan na mung mare masha n kau tinang man ang ai shara ni de hprawng yen ai lam ni mung nga taw sai lam matut chye lu ai.

Na Mawn, Chaung Wa mare na Jinghpaw re ai Mung shawa ni gaw, lai wa sai 2024 July shata kaw na hprawng yen ai gaw, dai ni ten du hkra hprawng yen taw nga ai rai nga ai.

Myen hpyen dap dapnu 33 na hpyen hpung ni gaw dai ning February shata praw kaw na dai ginra de hpyen n’gun kaba hte shang wa ai hpang, Sam Hkyeng SNA dap, Pyithutsit ni hte pawng hpawm let, dai ginra mayan kaw hpyen shamu shamawt ai lam ni ding yang galaw wa ai re.

Myen hpyen dap ni ndai laman Indawgyi ginra de nbungli hte jahkring hkring sa gap ai lam ni galaw nga ai hpe yu yang, Indawgyi Gwi Hka lam lapran na KIA dap shara ni hpe htim gasat zing mayu ai masa re nga na, hpyen masa yu maram ai ni tsun da ai re.

” Ya Indawgyi maga de nbungli hte grai bai sa gap wa ai hpe yu yang, Indawgyi hte Hpakant Gwihka lam mayan na KIA PDF dap shara ni hpe bai htim gasat wa mayu ai majaw re ngu maram lu ai le,” nga tsun maram da ai re.

Indawgyi Hwi Lung, Nyaung Pin, Chaung Wa ginra na Myen hpyen dap shara ni hpe Wunpawng Mungdan Shanglawt Hpyen dap KIA hte pawng hpawm dap ni 2024 ning June shata 22 ya shani htim gasat zing madu la lu wa ai re.

Ya ten dai ginra hta Myen hpyen dap dapnu 33 hte Sam Hkyeng SNA dap Pyithutsit ni pawng hpawm let hpyen shamu shamawt nga ai rai nna, KIA ni nga ai shara de htim gasat ai lam ni galaw taw nga ai re.