Wunpawng Mungdan Shanglawt Hpyen dap KIA masat 8 Dapba , masat (5) Dapdung ginra na Ga Hkyeng Bum mare hta Myen hpyen dap Jet Fighter nbungli lahkawng hte bawm sa jahkrat bun kau da ai lam chye lu ai.
March 31 ya shana hkying 5 daram aten hta, Ga Hkyeng Bum Ginwang Training Pa langai hta Myen hpyen Jet Fighting nbungli 2 the bawm sa jahkrat bun ai majaw, dai kaw rang rut la nga ai, hpyen la n kau si hkala hkrum wa ai nga, shawng lam hpyen magam gun hte ni nawn ai ni tsun ai re.
“Re mana hkying 5 ram kaw, Dapba 8 ginra na Trainning Pa langai kaw nbungli bawm wa jahkrat ai, ramma marai 36 si ai, marai 20 jan hkala ai lam chye lu ai,” nga tsun shateng ai re.
Ndai masa lam the seng na KIA Shiga magam dap lithkam Dukaba Nhpang Naw Bu hpe KNG maga san yu yang, Dapba 8 ginra de bawm sa jahkrat ai lam teng ai rai tim, masha si hkala ai lam the seng na gaw a tsawm tup hkrak rai n chye lu shi ai lam tsun ai re.
Myen hpyen dap nbungli bawm wa jahkrat ai shara gaw, Ga Hkyeng Bum Ginwang, Gau Gwi Hka makau KIA Dung 5 ginra na rang rut dabang shara hta wa hkrat ang ai re lam chye lu ai.
Ndai laman dai shara hta, KIA PDF ni hpe rang rut jaw taw nga ai ten mung re lam chye lu ai.
Myen mungdan kata Nnang Nawn shingra hpyen kaba hkrum sha nga ai majaw, Mungdan ting yawn madai taw nga ai ten mung shawa ni hpe lawan hkye mawai shaw na malai, majan byin ai lam mung n nga ai shara ni de nbungli bawm hkan jahkrat nga ai lam gaw n byin ging ai lam re nga, mung masa yu maram ai salang langai KNG de ndai zawn matut tsun da ai re.
“Mungdan ting yawn madai nna, Myen hpyen dap kaw na nan mung ဝမ်းနည်းချင်း nga na bat mi masat ai, mungdan ting masat da ai, ndai ten hta hpyen dap gaw tinang mungdan masha ni ya na zawn shingra hpyen Nnang nawn kaba hkrum sha nga ai ten, Hpyendap n nga, Balik Wansat dap magam gun ni ma hkra gaw, dai shingra hpyen hkrum ai mungchying mung shawa ni hpe hkan hkye mawoi na malai, nbungli hte bawm hkan jahkrat bun nga ai lam gaw, tsep kawp n byin ging ai lam re,” nga na tsun madi madun da ai re.
Ya n bungli bawm wa jahkrat ai shara gaw, hpa majan mung n nga ai shara re lam chye lu ai.
Myen mungdan kata shingra hpyen Nnan nawn kaba hkrum ai hpang kaw na KIA PDF dap ni htu shadut htim gasat ai lam ni yawng hpe n galaw ai nga Dukaba Naw Bu KNG de tsun ai re.
