Zahkung Ting Ying Woi awn ai Pyithutsit hpung ni Myitkyina kaw masha mahkawng ai lam galaw nga
Zahkung Ting Ying Woi awn ai Pyithutsit hpyen hpung ni n dai laman Myitkyina Myen hpyen dap daju, M.P.Hk hta masha bai mahkawng taw nga ai lam Hpyen masa yu maram ai ni kaw na chye lu ai.
Zahkung Ting Ying woi awn ai Pyithutsit, Jarit Sin dap BGF shara yawng hpe KIA htim gasat zing madu kau ai hpang, Pyithutsit hte BGF hpyen la ni hpe Myitkyina hta bai shaga mahkawng taw nga ai lam hpyen masa yu maram ai ni tsun ai re.
“Pyithutsit ni Myitkyina hkran de bai mahkawng taw nga ai, BGF Pyithutsit hpyen la ni yawng hpe La Hka jaw na bai shaga mahkawng taw ai da, maram yu yang ning de bai shang wa na masa nga ai,” nga tsun ai re.
Ya na zawn Pyithutsit hpyen la ni hpe Myitkyina hta bai shaga mahkawng taw ai lam gaw, mi tat sum kau ai shara ni hpe Myen hpyen dap hte pawng na bai gasat la na matu hkyen taw nga ai masa re lam, Hpyen masa yu maram ai ni matut tsun da ai re.
Chihpwi ginra de bai gasat maden la lu na matu, ndai laman Waimaw Washawng lam lapran hta Drone hte bawm hkan jahkrat nna, Myitkyina kaw na Waimaw maga de laknak kaba ni the ding yang bai gap bun taw nga ai re.
Dai hpawt manap hta mung, Waimaw Lamyang mare makau hta Drone bawm sa jahkrat bun kau da ai nga ginra masha ni KNG de tsun ai re.
“N-nang Nawng ai hpang shani lani mi sha hkring ai, ndai laman n dai de laknak n sen ngoi ai bat mi jan sai, dai hpawt mung hkying 7 kaw na hkying 9 lapran Lamyang mare makau grup yin Drone bawm hkan jahkrat taw nga ai, tsawm ra ngoi gadu ai,” nga tsun ai re.
Myen hpyen dap hte Pyithutsit ni pawng hpawm nna, n dai laman Waimaw ginra ni de hpyen shamu shamawt ai lam ni bai galaw taw nga nna, Waimaw Hk.L.Y 58 dap shawng hta mung shawoi na hta ladu lai san jep ai lam, dap shara shagreng ai lam ni galaw taw nga ai nga, ginra masha ni tsun ai re.
Myen hpyen dap hte Pyithutsit ni pawng hpawm nna hpyen shamu shamawt taw nga ai majaw, n dai laman Waimaw ginra de majan bai byin wa na masa nga ai lam hpyen masa yu maram ai ni tsun tawn ai re.
