Hkringmang Daju hte Rapdaw Ningbaw magam lit hpe Party garan shatsam na matu tang shawn

Mungdaw Hkringmang Daju hte Rapdaw Ningbaw magam lit ni hpe party garan shatsam na matu NLD hte ra lata poi dang ai amyusha bawsang party na dat kasa ni a January praw 1 (dai ni) hkrum zup ai hta bawngban ai hpe chye lu ai.

1947 ning Pang Lung ga sadi hpe mahta ai Federal mung masa byin lu hkra Asuya uphkang dap (Executive) hte Upadi ka lajang rapdaw (Legislature) magam lit hpe nbung ai party hpe garan shatsam na matu tang shawn ai lam KSPP party ningbaw Dr. Manam Tu Ja tsun ai re.

“Federal hta upadi ka ai rapdaw, uphkang magam dap hte tara jeyang ai dap nga nna nga ai. Madung gaw upadi ka ai hte uphkang ai ahkang aya gaw ta tut hta grai ahkyak ai. Ndai lahkawng hpe shada rap ra hkra gawn jep na ahkyak ai. Hkringmang Daju hte Rapdaw Ningbaw lit hpe party garan na matu ningmu tang shawn da sai re” nga nna tsun ai.

Myitkyina, Amyusha Democracy Ginjaw Party NLD Rung e January praw 1 ya shani hkrum zup hpawng hpe NLD maga marai 3 committe rai nga ai Dr. Aung Moe Nyo, Nan Khin Htwe Myint hte Slg. Nhtung Hka Naw Sam ni woi awn ai rai nna, mungdaw hkringmang daju Dr. Hkyet Awng hte Rapdaw Ningbaw yan mung shang lawm ai re.

Lai wa sai 5 ning tup hta Jinghpaw mungdaw hte kaga mungdaw ginra law law e, rapdaw ningbaw hte ningtau ningbaw lit yawng hpe NLD hkrai lit la galaw nga ai re.

Jinghpaw mungdaw e ra lata poi dang ai amyusha party na dat kasa marai 10 nga ai raitim, dai ni na hkrumzup hpawng hta KSPP na marai 3, Du lay party na marai 2, NDP(K) na marai 1 hte sha shang lawn ai re.

NLD maga amyusha baw sang party ni hte hkrumzup na matu tsun da ai raitim, ndai kalang hkrumzup ai gaw Party to Party nre ai sha, ra lata poi dang ai dat kasa ni hkrai san san hkrum zup ai lam sha re hpe chye lu ai.

KSPP pawng hpawm party hku nna mung ndai hkrum zup ai lam gaw party a gawng malai nre sha, dat kasa ni a ningmu sha re nga nna tsun ai re.

Read Previous

NLD gaw Jinghpaw hte Mon Amyusha Party ni hte shawng hkrum shaga na

Read Next

Nang Zaw KIA dap de Myen hpyendap laknak kaba gap bun

Leave a Reply

Your email address will not be published.