Ra lata poi ngut ai shaloi NLD party hku nna amyusha mungmasa party ni hpe saw shaga da ai hte maren shawng ningnan hku nna Jinghpaw hte Mon amyusha party ni hte hkrum shaga mat wa na re lam chye lu ai.
Ndai mungdaw 2 na amyusha party ni hte hkrum shaga ngut ai ginlam ni hpe NLD ginjaw de nhtang tang madun ngut ai hpang she kaga mungdaw de bai matut hkrum shaga mat wa na re lam December 29 ya shani Nay Pyi Taw NLD rung e galaw ai zuphpawng kaw nna chye lu ai.
Amyusha mungmasa party ni hte hkrum shaga na matu NLD ginjaw kaw nna lit jaw da hkrum ai marai 3 gaw Dr. Aung Moe Nyo (Ningbaw), Nan Khin Htwe Myint hte Myitkyina Amyothar Hluttaw dat kasa Slg. Nhtung Hka Naw Sam ni rai nga ai.
Shanhte gaw NLD dat kasa ni hte shawng hkrum zup na rai nna, dai hpang she Jinghpaw mungdaw amyusha mungmasa party ni hte hkrumzup mat wa na re lam Slg. Nhtung Hka Naw Sam tsun ai re.
Dr. Aung Moe Nyo hte Nan Khin Htwe Myint yan gaw December 30 ya shani Myitkyina de du lung wa na re hpe chye lu ai.
Ndai lam the seng nna Kachin State People’s Party KSPP ningbaw Dr. Manam Tu Ja hpe san yu yang, kaga tsun dan na lam nnga shi ai nga nna tsun ai re.
Myen munghpawm mungdan hpe 1947 Pang Lung ga sadi hte maren gawde sa wa shangun mayu ai lam KSPP party gaw NLD hpe laika nhtang da ai re.
