Jinghpaw Wunpawng pawng hpawm pati, KSPP gaw du na November ra lata poi kaw Jinghpaw Mungdaw rapdaw shara yawng 67 hta shang shingjawng na re lam, pati ningbaw ni tsun shagrin sai.
Kachin State People’s Party gaw Mungdaw kata amyusha rapdaw, mungshawa rapdaw, mungdaw rapdaw hte laksan amyu baw hkringmang (ye-ya wun-gyi), yawng shara 70 nga ai kaw ma hkra hta shingjawng na shawng e hkyen da tim, shara 3 kaw n lu shingjawng ai lam rai nga ai.
Dai shara ni gaw Saw Law mungdaw rapdaw shara, hte laksan amyu baw hkringmang shara lahkawng— Rawang hte Lisu re. Saw Law hta matut mahkai hte hkawm sa hkawm wa grai yak hkak ai majaw aten dep dat kasa mying jahpan bang na hpang hkrat ai majaw n lu shingjawng ai rai nna, Rawang hte Lisu ye-ya wun-gyi shara yan hta gaw kadai myit n lawm ai majaw re nga nna, KSPP Ningtau Ningbaw 2, Duwa Gumgrawng Awng Hkam sanglang dan ai re.
Jinghpaw Mungdaw ningpawt pati yawng 7 ra lata poi shang na hta KSPP gaw dat kasa law dik hte madung pati re.
Ngam ai, Sam Hkyeng TNDP (Tai-leng Nationalities Development Party) gaw shara 30, Lisu LNDP (Lisu National Development Party) gaw shara 23, Kachin National Congress (KNC) gaw shara 17, Zahkung Ting Ying a NDPK (New Democracy Party-Kachin) gaw shara 11, Lhaovo (Maru) LNUDP (Lhaovo National Unity and Development Party) gaw shara 5 hte Sam Hkyeng SSP (Shanni Solidarity Party) gaw shara 5, ni hta re.
Pati hku nna mali, masha hku nna pati kru hte pawng gahkyin ai KSPP gaw madung asuya daru magam lu NLD (National League for Democracy pati) hte hpyendap hkri dun USDP (Union Solidarity and Development Party snr Hkanghkyi pati) yan hpe shingdaw shingjawng na hkyen da ai re.
Du na Nov. 3 ra lata poi a matu, Jinghpaw Mungdaw kata, KIO uphkang ginra n lawm ai sha, asuya uphkang ginra ginwang (myu-ne) yawng18 hta e me (sin dan pa) jaw lu ai masha jahpan wan mi jan nga ai lam, Jinghpaw Mungdaw Ra Lata Poi Komishin hku chye lu ai. Lai wa sai 2015 ra lata poi ten hta gaw me jaw lu ai masha jahpan 870,000 nga ai re.
