Jinghpaw Wunpawng Hkalup Hpung Ginjaw, KBC, Ningbaw Rev. Dr. Hkalam Samson gaw Laiza kaw nna Myitkyina de wa ai hkrun lam, Nam San Yang kaw Myen asuya dap ni gan pat ai hkrum tim, bai lai lu sai lam chye lu ai.
Hpyen yen dum nta wa lam hte seng nna galaw nga ai KHCC ningbaw mung rai nga ai Rev.Dr. Hkalam Samson gaw shawoi laiza de sa ai ten, asuya hte hpyendap hpe shana ai raitim, ndai kalang shiga nshana ai sha lai hkrup ai majaw ya na zawn byin ai re nga nna tsun ai re.
“moi KHCC gaw hkawm yang, shana na hkawm ai le asuya hte hpyendap hpe, ndai kalang gaw loi kyin mat jang she, n shana kau rai yang gaw bai shana shangun ai rai nga ai. yawng bai asin pye mat sai.” nga nna Rev.Dr. Hkalam Samson tsun ai re.
Myitkyina kaw nna Wunpawng Mungdan Shawnglawt Hpung, KIO Laiza de July 16 ya shani zuphpawng hte lai shang ai hpang, bai pru wa ai lam July 18 ya shani byin ai lam rai nga ai.
“dai shani jang Taing de shana, Mungdaw asuya de shana nna chyena hkra tsun na, ahkyak gaw tara shang galaw taw nga ai ahkang hpyi ra ai hpe tsun ai rai nga ai. Shiga na dat ai hte chyawm dai hku mai shadu ai le.” nga nna Rev.Dr. Hkalam Samson matut tsun ai re.
Myitkyina-Manmaw lam Nam San Yang mare mawdaw daru kaw nna Laiza de bu hkawm masha ni pru-shang lam hpe Tatmadaw Myen hpyendap hte KIO lapran, shada chye na hkat ai masa hte hkawm sa hkawm wa galaw nga ai re.
