Nam Jim sut hpaga ginra, MOU ladaw n-jat ai sha, jahkring da

Nam Jim Sut Hpaga Ginra

Jinghpaw mungdaw asuya hte Miwa company lapran ginrun hkrang shapraw galaw na Nam Jim sut hpaga ginra hte seng nna, (MOU) Shada chyena myit hkrum lam hpe ladaw n-jat sai sha gan jahkring da ai nga nna, July 17 ya shani Jinghpaw mungdaw asuya a shiga dap sanglang hpawng hta tsun ai re.

Shawng ningnan lang Nam Jim sut hpaga ginra galaw na matu Jinghpaw mungdaw asuya hte Miwa company lapran 2018 May shata praw 8 ya shani MOU myithkrum lemat mahkret sai re.

Raitim de a shata 6 na ai hpang November 11 ya shani Mungdan Gumsan Magam a matsun laika langai a majaw MOU matut galaw ai lam hpe jahkring da ai nga nna Mungdaw Sut magam bungli masing hte seng ai hkringmang salang Wai Lin tsun ai.

“dai matsun hta nhpa baw lawm ai nga yang, mungdan jarit kata na bungli masing kaba galaw na rai yang gara hku hkan sa ra ai hpe madun da ai. Masing kaba galaw na nga yang, ahkyak dik gaw brang lang ra ai” nga nna tsun da ai”

Mungdan gumsan magam matsun a majaw 2018 May praw 8 ya shani Miwa company hte MOU myit hkrum da ai lam hpe matut ladaw jat ai lam n-galaw sai sha, company shada shingjawng ai ladat hpe bai lata sai re.

Shada shingjawng nna lata lahkrum ai Company hte MOU, MOA, hte JVA matut galaw mat na re nga nna tsun ai.

Nam Jim sut hpaga ginra gaw Myitkyina mare kaba a sinna maga deng 8 daram e nga ai shara re. Masing galaw na shara gaw eka 4700 rai nga ai. Tinang a lamu ga re lam tara shang n-madun lu ai kadai hpe mung, masing hte seng nna sum machyi manu jaw na nre nga nna mungdaw asuya tsun da ai re.

Lai wa sai gum san magam Thein Sein Lakhtak Jinghpaw mungdaw kata shara 3 hta sut hpaga ginra galaw na matu hkyen da ai rai nna, ya NLD asuya lakhtak Nam Jim hpe lata nna sut hpaga ginra galaw na hkyen hpang wa ai rai nga ai.

Raitim, ndai masing hte seng nna ginra masha ni chye gying ai lam yan ni hpe asuya gaw tsun sanglang dan ai lam nnga ai lam ginra masha ni tsun ai re.

Read Previous

KBC Ningbaw Rev. Dr. Hkalam Samson a KIO Laiza kaw na nhtang wa ten jep hkrum

Read Next

Jahtu Zup mare 2 ya tup hka tung nga(sumla)

Leave a Reply

Your email address will not be published. Required fields are marked *