Jahten Sharun Hpung ginra ni hta lai Majan Jahkring ai lam Myen hpyendap ndau

March 6, 2020, Kawnghka Kani Nanghpam Shiga Salang Lamang. Sumla: facebook

Jahten Sharun Hpung ngu masat tawn ai wuhpung ginra ni hta lai, ngam ai shara yawng hta May 10 kaw nna August 31 du hkra majan jahkring tawn ai lam, Myen hpyendap May praw 9 hta ndau dat sai.

COVID-19 ana zinli makawp ninghkap hte tsi lajang lam hpe atsawm grak laga galaw lu na matu hte htani htana simsa lam gawgap lu na yaw shada let ya na zawn majan jahkring ai re nga, tatmadaw Dap Up Daju rung ndau hta tsun ai.

Ya ten terrorist (ningchyun shanang jahten sharun hpung) ngu masat hkrum ai gaw Rahkai Arakan Army (AA) hte Arakan Rohingya Salvation Army (ARSA) yan rai nhtawm, ndai ten hpyen majan mung Rahkai mungdaw hte Palewa, Hkang mungdaw e grai na du nga ai re.

Jinghpaw mungdaw kata AA hpe hkapla tawn ai KIO ginra ni hta ndai majan jahkring ai ndau hkan shatup na masa n nga ai re. Lai wa sai March 20 hta, AA nga ai KIO Laiza hte Mai Ja Yang mare lahkawng gasat hkrum wa na re lam, Myen hpyendap kawn KIO hpe sadi jaw ai lam nga sai.

Ndai zawn shata 3 jan majan jahkring da ai ladaw, amyusha laknak hpai hpung ni hku nna tatmadaw Dap Up Daju a simsa lam lamyan (6) hta na (4) hpe hkan sa ra na re lam shadut tawn ai.

Dai lamyan mali gaw, myit hkrum da sai ga sadi ni hte maren sadi dung na matu, simsa lam ga sadi ni ntsa amyat n htuk na matu, buga ginra mungchying mungshawa ni hpe jamjau n jaw na matu, mungdan kawn shagrin da chyalu upadi ni hpe hkapla hkan sa na matu, tsun tawn ai.

Dai hta n ga, laknak hpai hpung shada da gasat gala n galaw na hte ginra masha ni ntsa adip arip n galaw na lam, asuya uphkang dap, matut mahkai hkawm sa hkawm wa lam hte mungshawa akyu ara hpe makawp maga lit la na matu, tsun shadut tawn ai re.

Lama na ndai lam ni hpe hkan sa ai lam n nga yang, tatmadaw gaw man ang ai hku ahkyak la na re lam tsun timung, gara ladat hte ari jaw na lam gaw n sanglang tawn ai.

0 Reviews

Write a Review

Read Previous

Gala Nbung Dap MiG-29 jet pyenli hkrat kapaw

Read Next

Asia World Company a Muse numshang shagyit hta bawm kapaw

One Comment

  • Duwa Sinwa Nawng tsun ai hku nga yang, Myen hte “arau” Independence la ai re. Inglik up hkang ai kaw na lawt lu ai hang Mungkan Wunpawng Hpung “UN zawn, ASEAN” zawn hpung ni a krum ningtum ai lam ni hkap la nna, Jinghpaw ni tinang lagaw tinang tsap na matu tsun lai wa sai.

    Jinghpaw ni galw ra na gaw, lawu ga Naypyi Daw de yu n nhte n sa jahta ra ai. UN rung kaw sha anhte tsun jahta ra na.

    Ya gaw Myen na Taiyinda re ai majaw lama mungkan karum kahtau lam ni gaw Myen Asuya de sha du ma ai.

    Anhte galaw ra na gaw, Myen kaw na gumhpraw sa n hpyi ra ai.

Leave a Reply

Your email address will not be published. Required fields are marked *