Myitkyina Mandalay Nmaw lam Kaba Yawng Pat

Jinghpaw Mung Sagaing jarit, Namsi Awng hte Mawlu lapran majan laja lana matut byin nga ai majaw, Myitkyina Mandalay nmaw lam kaba pat nga ding yang re lam, mawdaw la ni kaw na chye lu ai.

Mandalay Katha lapran hta a tsawm sha hkawm sa mai ai rai tim, Katha – Naba -Mawlu – Namsi Awng lam nmaw kaba pat da ding yang re lam chye lu ai.

Majan nhpan a majaw, Myitkyina Mandalay shawng hpang lahkawng maga na lam ni yawng pat tawn ai lam mawdaw la langai KNG shiga de n dai zawn tsun dan re.

“Myitkyina Mandalay lam gaw ရှေ့လမ်း၊ အနောက်လမ်း lahkawng maga hpe pat tawn ai, Katha hte Mandalay gaw mai hkawm ai, ya gaw Katha Sinna maga gara lam hku mung n mai ai ga rai nga ai, ya Katha kaw gaw, Myikyina de lung na mawdaw tsa lam pat taw ai ga rai nga ai,” nga tsun ai.

အရှေ့လမ်း ngu ai gaw, Indaw – Naba – Katha lam n maw hpe tsun ai rai nna, အနောက်လမ်း ngu ai gaw, Indaw koi lam rai nga ai, Indaw – Nante – Meza – Kukkotaw – Dopin lam hpe ngu ai rai nga ai.

Lai wa sai shaning ni hta Naba Katha lam hpe pat tawn ai rai tim, Indaw Meza koi lam hku lai taw ai rai nga ai.

Ya n dai kalang majan laja lana gap gasat hkat wa ai hpang gaw, Myitkyina Mandalay lam lai mai ai lam yawng hpe pat tawn ai rai nga ai.

Lai wa sai bat kaw na KIA hte အမှတ် (၁) စစ်ဒေသ na PDF pawng hpawm ni Myen hpyen up madu tawn ai Mawlu hte Naba mare hpe htim gasat ai kaw na majan byin wa ai rai nga ai.

November praw 3 ya shani KIA, ABSDF hte PDF pawng hpawm ni Mawlu Indaw Naba lam n maw kaba hpe lu gasat wa ai hpang, Myen hpyen maga, November 4 ya jahpawt jau kaw na, nbungli bawm laja lana wa jahkrat bun ai majaw, dai lam nmaw kaba mayan hpe bai tat sum kau ra mat ai lam, shawng lam hpyen magam gun hte ni nawn ai salang langai KNG de ndai zawn tsun dan wa ai re.

“November 3 ya shani gaw Indaw Mawlu lam nmaw kaba hpe lu gasat jahtaw ai rai nga ai, Myen ni nbungli bawm nau wa jahkrat ai majaw, bai yen kau ra mat ai, November 4 ya jahpawt Sinat lau 14 gaw padang dip ai lam nga ai da,” nga tsun ai re.

Ya ten KIA PDF pawng hpawm maga na Namsi Awng hte Mawlu lapran drone laknak kaba ni hte gap gasat ai lam ding yang galaw nga nna, Myen hpyen maga na mung nbungli hpan hkum hte shani shana bawm wa jahkrat bun nga ai majaw, majan ding yang matut byin nga ai lam chye lu ai.

Ndai laman gap gasat hkat ai hta Myen hpyen dap ni dung da ai Si Ping, Hpa Pant, Pin Way grup yin de na dap shara masum hpe gasat padang dip la lu ai lam nga ai hpe matut chye lu ai.