𝐌𝐲𝐢𝐭𝐤𝐲𝐢𝐧𝐚 𝐌𝐚𝐧𝐝𝐚𝐥𝐚𝐲 𝐥𝐚𝐦 𝐌𝐚𝐣𝐚𝐧 𝐛𝐲𝐢𝐧 𝐚𝐢 𝐦𝐚𝐣𝐚𝐰 𝐋𝐚𝐦 𝐍𝐦𝐚𝐰 𝐁𝐚𝐢 𝐏𝐚𝐭 𝐒𝐚𝐢

Myitkyina Mandalay lam nmaw kaba hpe dai na maga de kaw na, laknak hpai lahkawng maga na pat kau sai lam, shawng lam magam gun hte ni nawn ai ni kaw na chye lu ai.

Ndai laman Katha hte Htichyaik maga na Myen hpyen ni Indaw Naba lam numbraw maga de hpyen n-gun kaba htu shadut htim gasat wa ai majaw, n dai laman shani shagu majan byin taw nga ai re.

Majan byin taw nga ai ginra de Myen hpyen dap maga November praw 4 ya shani kaw na nbungli hte laja lana wa gap gasat ai kaw na majan laja lana gasat taw ai gaw ya ten du hkra gasat hkat taw nga ai re.

Majan byin taw nga ai lapran hkrun lam hkawm mung shawa nkau hpe masa lam hta hkan nna naw shalai ya taw ai rai tim, dai na maga na gaw yawng hkra tsep kawp pat kau sai lam, dai shara kaw na lit nga ai magam gun hte ni nawn ai Salang langai KNG de n dai zawn tsun da ai re.

“Mandalay Myitkyina lam bai pat sai, dai na maga de kaw na gaw tsep kawp pat kau sai, shawoi gaw yu nna, koi lam ni hku naw shalai ai rai tim, dai na kaw na gaw tsep kawp rai sai,” nga tsun ai re.

Mawlu kaw Mani hpawt kaw nna, majan laja lana bai gap gasat hkat wa ai majaw, lam lapran hkrun lam hkawm mung shawa mawdaw tsa kaba pat hkrum taw nga ai re.

Dai na maga de Indaw kaw pat hkrum taw ai mung shawa mawdaw langai hpe Myen hpyen drone bawm wa hkrat bun ai majaw, mawdaw langai wan hkru hten hkrum ai hpang, mawdaw yawng Mawlu maga de bai n htang na matu Indaw Revolution maga tsun ndau wa ai lam nga ai hpe chye lu ai.

Myen hpyen maga na gaw, Majan byin nga ai ginra de nbungli bawm ding yang jahkrat bun nga ai lam matut chye lu ai.

Myen hpyen maga nbungli bawm hkan jahkrat bun ai majaw, Namsi Awng mare kaw mung wa hkrat ai lam nga ai lam ginra masha ni tsun ai.

“Mawlu Naba lam numbraw kaw mani kaw na nbungli bawm jahkrat nga masai, Mani hpawt kaw na jahkrat ai, mana n sin si hkra jahkrat bun ma ai, ngut na dai hpawt kaw na mung jahkrat nga masai, dai hpawt gaw Namsi Awng kaw mung langai wa hkrat ai,” nga tsun ai.

Ya ten Naba lam numbraw, Indaw, Mawlu mare grup yin ni hta majan laja lana gasat hkat taw nga ai re.