Nawng Ing kaw SNA ni Mung Shawa Dum Nta Hpya La Nna Dap Shara Gap Nga
Nawnglut Ginra Na Mawn hte Mai Nawng Mare ni kaw, SNA dap ni mung shawa dum n ta hpe run nna, hpyen dap gaw gap taw ai lam, ginra mung shawa ni tsun ai re.
Ndai laman SNA hte Myen hpyen hpung ni Sezin Hummalin lapran na dap shara ni hpe tat sum kau ma ai hpang, Na Mawn, Mai Nawng mare ni de hpyen n-gun jat bang ai lam ni ding yang galaw nga ai re.
Ya ten SNA maga Namawn hte Mai Nawng mare kaw mung shawa dum n ta adup hpya nna, dap shara gaw gap nga ai lam hte seng nna, ginra amyu shayi langai KNG de n dai zawn tsun dan tawn ai re.
“Namawn hte Mai Nawng mare mung shawa dum n ta hkan na chyinghkyen shakum ni run la nna, shan hte dap shara nnan galaw nga ma ai, Mung shawa nta nkau hkan SNA magam gun nkau hpe nga shangun ai lam ni galaw nga ma ai, nkau n ta n lu shangut shi ai hkan na hpun ngau ni mung kam ai ai hku la taw ma ai,” nga tsun ai re.
Lai wa sai October 20 ya daram kaw na KIA hte Pawng hpawm ni Sezin hte Hummalin lapran na SNA dap shara ni hpe htim gasat zing kau ai hpang, SNA ni mung shawa hpe hpyen ninggang shatai nna hprawng gale pru wa ai lam, KIA Magam gun langai mung ndai zawn tsun ai re.
“SNA ni gaw Mung shawa hpe hpyen ninggan shatai woi lang nna shan hte hpang n kam hkan nang ai mung shawa nkau gaw Hpungkyi jawng kaw ngam kau da ai ni nga ai, dai hpungkyi jawng hpe nan shading nna nbungli bawm bai sa jahkrat shangun, Pound 500 kaba ai nbungli bawm 2 sa jahkrat da ai, marai 7 hkala ai, langai gaw ram ram hkala sawng mat ai,” nga tsun ai re.
Mung shawa ni hpe hpyen ninggang shatai woi ai majaw, mung shawa ni n kam hkan nna, hpungkyi jawng kaw hprawng makoi nga ai hpe SNA maga nbungli shaga nna bawm jahkrat bun wa ai lam hpe chye lu ai.
October 31 ya shana mung shawa ni hpungkyi jawng kaw hprawng makoi yen taw ai hpe Myen hpyen nbungli bawm sa jahkrat bun ai majaw, mung shawa marai 7 hkala hkrum nna, langai gaw hkala sawng hkrum wa ai lam nga ai hpe chye lu ai.
Ya ten SNA ni Na Mawn hte Mai Nawng mare kaw dap shara kring mading galaw na hkyen shajin taw ai mung rai nga ai.
SNA maga ya na zawn mare kata wa du dap jung nga ai majaw, Jinghpaw ni gadai mung lai hkawm n mai, hkrit maja na hkrai nga ra ai lam ginra masha ni tsun ai re.
