Waimaw Dulay Pyithutsit hpung hpaw ai (5) ning hpring poi lamang galaw na re majaw, makau grup yin ni de laknak kaba gap shapyen bun ai lam galaw wa ai nga, ginra masha ni tsun ai re.
October 31 Bat (6) ya shana hkying 9 jan hta, Waimaw (58) dap kaw na Hkat Cho hte Nawng Hkyi mare lapran de laknak kaba (3) lang gap bun ai lam ginra masha langai KNG shiga de n dai zawn tsun dan ai re.
“Kru ya shana hkying 9 jan kaw Waimaw Hk.L.Y (58) Dap kaw na laknak kaba bai gap shapraw ai majaw, anhte hpyen yen ni loi tsang kau ai. bai san sagawn yu yang gaw, Pyithutsit ni poi galaw na majaw re lam bai chye lu ai,” nga tsun ai.
Myen hpyen maga gap dat ai laknak kaba Chyang Hkang Pa kaw wa hkrat ai lam hpe matut chye lu ai.
Ndai laman hta Waimaw ginra majan byin ai lam n nga tim, Myen hpyen maga hpyen n gun htu ai lam ni ding yang galaw nga ai lam ginra masha ni tsun ai re.
Waimaw maga de Myen hpyen maga htu shadut nga ai majaw, n dai November shata ram kaw na, majan laja lana byin wa na masa nga ai lam, hpyen masa yu maram ai ni tsun tawn ai re.
Ya ten Waimaw Dulay Pyithutsit hpung hpe U Shwe Min na kasha Ma Gam แกแฌแธแแฌแธ woi awn taw nga ai re lam chye lu ai.
Dulay Pyithutsit hpaw ai (5) Ning hpring lamang hta Pyithutsit byin pru wa ai lam hte amyu bawsang shagu na Pyithutsit hte zinghkri nna, tinang girna lamu ga makawp maga sa mat na lam hte seng na tsun mat ai lam nga ai hpe chye lu ai re.
Dai ning na Pyithutsit hpaw ai (5) ning hpring hpawng lamang hta, Salang Shwe Min si mat ai shani hpe Dulay Pyithutsit a share shagan n htoi hku masat ai lam mung, jawm myit hkrum wa ai lam nga ai hpe chye lu ai re.
Wunpawng Mungdan Shanglawt Hpung hku na gaw, Pyithutsit hpung hpaw ai lam n galaw na matu masat n htoi mungga shagu hta tsun tawn ai hpe mu lu ai re.
KIO maga Myen hpyen dap sumprat Pyithutsit hpaw ai lam hpe n galaw na matu lang hte lang tsun sadi jaw ai rai tim Pyithutsit hpung hpaw ai grau law wa ai lam gaw, tinggyen akyu ara na matu re lam Sara Sin Ram KNG de tsun tawn ai re.
