Myen-Miwa ga jarit ni hta Coronavirus ana kanu jep hpang

Kambaiti e hkum gahtet, n gahtet jep nga yang

Miwa mung Hubei ginwang, Wuhan mare kaw nna kap bra hpang wa ai Coronavirus, nsa sa lam hte seng ai ana Myen mung de nshang wa hkra ana jep ai lam hpe Jinghpaw mungdaw ga jarit ni hta galaw hpang nga sai re.

Masha law law si hkrum wa sai ndai ana Miwa mung e myit tsang hpa madang rai wa sai majaw, Jinghpaw mungdaw ga jarit ni hpe pat kau na matu Mungdaw asuya kaw nna Munghpawm asuya hpang de laika tang da ai hpe mung chye lu ai.

“Mungdan madang kaw nna myit hkrum let galaw da ai ga jarit gate ni re majaw, anhte mungdaw asuya hku nna laika mara da ai sha re. Ya du hkra pat u, hkum pat nga nna matsun ai lam gaw ndu shi ai” nga nna mungdaw masha gawn hpang hkringmang salang Zaw Win tsun ai re.

Dai ni January 27 kaw nna Kampaiti Myen-Miwa ga jarit dawnglawng hku e Miwa shangwa pru wa masha ni hpe hkum gayet ai lam nga nna, san jep hpang nga sai lam Mungdaw hkamja dap kaw nna ndau da ai re.

Masha langai hta ana kap sai nga yang, kumla n madun tim, shada kap bra mai ai majaw, asuya hku nna ga jarit lam hpe ahkyak shatai gawn jep ra ai lam Waimaw ginra masha Slg. Ganese tsun ai re.

“Miwa mungdan gaw shanhte hta byin ai lam hpe byin mai yang kadai hpe shabrawng na nre. Raitim, ndai ana kanu gaw shanhte nan grai sadi nga ai re. Bai nna Miwa mung masha ni ndai Myen mung hkran de bungli sa galaw ai grai nga ai. Madung gaw Waimaw hku nna shangwa ai re majaw hkyak hkyak dabang gap nna ndai hpe ja ja jep ra na re” nga nna tsun ai.

Tara shang ga jarit gate (2) sha nga ai raitim, kaga lai lam law law naw nga ai majaw ana kanu nlu jep na hpe tsang ai lam tsun ai re.

Kampaiti hte jarit HtingChung mare e Miwa amyusha marai 2 Coronavirus ana kap ai lam nga ai zawn, Shweli ga jarit mare e mung ana kap masha mu ai majaw ya yang hkawm sa hkawm wa hte poi lamang masha hpawng ai lam ni hpe n galaw na matu ndau da ai re.

Coronavirus ana Miwa mung kaw nna ya yang Thai, Korea, Singapore, Japan mungdan ni de du hkra chyam bra nga sai lam shiga ni hta mu lu sai raitim, Miwa hte jarit sha re Myen mung hta gaw ya du hkra nmu shi ai lam seng ang ai hkam ja dap kaw nna tsun ai re.

Hpang jahtum gahkyin lu ai shiga hta Coronavirus ana kap hkrum ai masha marai 2000 jan sai rai nna, asak si sum ai marai 80 du sai lam Miwa mung shiga ni hta tang madun tawn ai re.

 

Read Previous

Myen asuya dap sa gap zing ai KIA D-17 na arung arai sumla pru

Read Next

Danai Ja maw, Pat maw e nhprang htu na lam Myen hpyendap dap awn daju hpe hpyi shawn da

Leave a Reply

Your email address will not be published.