Tag Archives: majan

Majan Shiga, Shiga

KIA Dap ba 9 npu dap dung 6, 26, 44 shara ni hta Myen hpyendap hpe kalang ta htim gasat

Leave a comment

Nawng Lut, Kamaing ginra hkan na Myen hpyendap shara 4 hpe Wunpawng Mungdan Shanglawt Hpyendap KIA Dap Ba 9 ni dai hpawt maga kalang ta sa htim gasat ai lam chye lu ai.

Nawng Lut Ginwang, Sezin mare makau Shwe Twi ngu ai Myen hpyen dap shara, Namlik Hka makau na SNA dap, Kamaing Myen hpyen Byuha kawng, Nam Sheng Myen hpyen dap ni hpe Wunpawng Mungdan Shanglawt Hpyen dap KIA Dapba 9  ni sa him gasat ai re lam chye lu ai.

January 26 ya jahpawt jau hkying 4 chyen daram aten, Seng Zin mare makau Myen hpyen dap hte Samhkyeng SNA dap ni pawng hpawm na nga ai Shwe Twi dap hte, Namlik Hka makau na SNA dap ni hpe KIA Dung 26 dap ni sa htim gap gasat zing kau lu ai lam shawng lam hpyen shi sawk ni kaw na chye lu ai.

Dai shara sa htim gap gasat ai hta, sinat laknak machyu pala alaw alam zing la lu ai rai nna, lahkawng maga kade daram sum machyi ai ngu hpe gaw tup hkrak n chye lu ai re.

Matut nna, Kamaing Myen hpyen byuha kawng hpe KIA Dapba 9 n pu Dung 44 ni laknak kaba ni hte sa htim gap ai hpang, lahkawng maga gasat gala byin wa ai lam chye lu ai.

Dai hpawt manap jau hkying 4 ram aten sa htim gap gasat wa ai rai nna, lahkawng maga sum machyi lam nga n nga re hpe gaw a tsawm tup hkrak n chye lu ai.

Kamaing Myen hpyen byuha dap a dap lakung langai rai nga ai, Nam Sheng mare kyuhpyi bum hta dap jung taw nga ai Myen hpyen dap ni hpe mung dai hpawt manap hkying 6 ram ten KIA Dung 44 hte PDF pawng hpawm dap ni sa htim gap gasat wa ai lam nga ai re hpe ginra masha ni kaw na chye lu ai.

Dai Nam Sheng Myen hpyen dap hpe sa htim gap gasat wa ai rai yang, mare yawng nat jahten kau ya na lam, Myen hpyen dap gaw mare salang hte nawku hpung ningbaw ni hpe tsun shadut da ai mabyin nga ai majaw, ya ten ginra mung mare masha ni myit tsang taw nga ai  chye lu ai.

Hpakant lam shara shagu hta majan byin wa ai majaw, dai hpawt manap jau Myitkyina Hpyen n bungli pa hta n bungli shamu shamawt wa ai lam ni nga wa ai re hpe Myitkyina Maw Hpawng ginra masha ni tsun dan ai re.

Wunpawng Mungdan Shanglawt Hpyen Dap KIA Dap ba 9 n pu hta, Dap Dung 6, 26, 44, ni lawm ai rai nna, dai dap dung ni yawng kalang dat majan hpaw wa ai lam mung rai nga ai.

Shiga

Muse ginra Myen Hpyendap Laknak Gap Bun ai majaw, Mungshawa ni Si Hkala hkrum

Leave a comment

Munggu kaw nna yu wa ai Myen hpyen hpung ni hpe Dingdung daw pawng hpawm dap ni, lam lapran bawm hte hkap shing la gasat dat ai hpang, Myen hpyen dap ni makau grup yin de laknak gap shadam bun ai majaw, mung mare masha langai si nna, langai hkala hkrum wa ai lam chye lu ai.

Dai na maga de hkying 1 chyen daram aten, dap shara galai na matu Munggu kaw na yu wa ai hpyen hpung ni hpe, Muse 105 mile kaw nna Chyin San Chyaw maga de yu wa ai lam lapran hta bawm the hkap gasat ai hpang, Myen hpyen dap ni gap shadam bun ai laknak a majaw, mawdaw gram taw ai mung shawa langai si nna, langai hkala hkrum wa ai lam mung rai nga ai.

Dai zawn hkap shing la gasat ai hta Myen hpyen dap maga de na sum machyi si hkala ai lam hpe a tsawm tup hkrak n chye lu shi ai re.

Dai hkala hkrum ai Mung shawa gaw ya ten, Muse mung shawa tsi rung hta tsi tsi hkam la taw ai lam chye lu ai.

Dai ginra mayan ni hta Myen hpyen dap, Pyi Thu Tsit dap, hte rawt malan hpung ni rai nga ai KIA, SSPP, TNLA, MNDAA dap hte PDF ni ding yang shamu shamawt taw ai shara mung rai nga ai re.

Shiga

Nmawk mare kata Myen hpyendap hpe KIA bawm hte hkap gasat

Leave a comment

Nmawk Mare kata hta dai hpawt manap hkying 11 daram e, Myen hpyen dap shamu shamawt hkawm ai hpe Wunpawng Mungdan Shanglawt Hpyendap KIA dung 15 ni bawm hte hkap gasat ai kaw nna Majan byin wa ai re.

Myen hpyen dap gap dat ai laknak kaba si, mung shawa dum n ta hta wa hkrat nna, n ta numgaw malawng mat ai hte Mung shawa langai, lagaw lahkawng maga hkala hkrum wa ai re lam chye lu ai.

Myen hpyen dap Hk-M-Y 437 dap na hpyen hpung ni hte Kyuhpyi bum maga de na yu wa ai Myen hpyen hpung ni hpe Nawng Pau lam num she hta bawm hte hkap gasat dat ai hta, Myen hpyen dap maga na si hkala ai lam nga ai majaw, mung shawa dum nta 2 hte Sengke gram seng langai hpe wan nat jahten kau ya ai lam matut chye lu ai.

Myen hpyen dap ni kaw na, n dai laman Lung Ja bum maga de laknak hpyen n gun bai jat shalun la na matu, lam de shim lam sa la ya na matu, Hk L Y 437 na ni hte Kyuhpyi bum na yu wa ai Myen hpyen hpung ni hpe hkap shing la dat ai re lam, shawng lam magam gun ni kaw na chye lu ai.

Dai zawn Myen hpyen dap ni nat kau ya ai n ta wan hkru ai majaw, dai kaw na mare ting wan hkru wa na hpe myit tsang ai majaw, mare salang wa kaw na wan sat dap de wan sat mawdaw shaga ai raitim, n tsa na matsun n lu ai nga nna, n sa sat ya ai re lam buga masha langai ya na zawn tsun dan ai re.

majan kata mung shawa hkala hkrum ai lam

“Mare salang wa gaw, Myen hpyen la ni nat kau da ya ai n ta kaw na mare ting wan hkru wa na masa nga ai majaw, wan sat dap de wan sat mawdaw shaga ai, ntsa na matsun n lu ai nga na n sa ai, mare masha ni hpe jawm shaga gahkyin na bai sat yang mung gadai n jaw sat lu na, nga nna Myen hpyen la ni sinat madi wa ai, dai hku hkru nga u ga nga tsun ai” nga mare masha langai KNG shiga dap hpe tsun dan wa ai re.

Dai zawn Myen hpyen dap ni hkap kapaw hkrum ai hpang mare ting laknak kaji kaba n sen ngoi hpang wa ai gaw dai na maga de du hkra re lam chye lu ai.

Nmawk mare kata de ya na zawn gap gasat hkat wa ai majaw, mung mare masha n kau Manmaw de hprawng yen ra taw ai re.

Dai zawn gap gasat hkat ai hta hpyen dap lahkawng maga sum machyi ai lam nga n nga hpe a tsawm n chye lu ai raitim, Myen hpyen dap ni hpe bawm hkap kapaw bun ai re majaw, Myen hpyen dap maga sum machyi si hkala ai lam nga na re lam, buga masha ni matut tsun dan wa ai re.

Nmawk ginra Lung Ja Bum mayan de Myen hpyen dap ni lai wa sai October 22 ya shani kaw na wa htim gap gasat hpang wa ai gaw, dai ni ten du hkra gap hkat dat, zim dat masa naw rai taw nga ai re.

Shiga

Nmawk, Lung Ja Bum Lagaw na Yi Hkauna Hkan, Mam Nmai Dan La

Leave a comment

Nmawk Giwang Lung Ja Bum lagaw na mare kahtawng ni hta Myen hpyen dap ni dap jung shara la taw ai hte, shani shagu ngu na laknak kaba ni gap shadam bun taw ai lam ni a majaw, Mung mare masha ni Hkau na mam shu dan la na matu shimlam nnga nna, yak hkak taw ai lam chye lu ai.

Lung Ja mare, Nawng Pau mare, Wa Wang mare hte Nmawk Hka Nan lawk ni hkan na, mare masha law malawng a hkau na gaw, Lung Ja Bum lagaw grup yin hkan rai nna, Myen hpyen dap ni kaw na laknak kaba ni hte jahkring hkring gap shadam bun ai majaw, kadai nlu dan ai sha, n kau mam ni krawp mat ma wa sai lam, Nmawk Hkanan lawk na mung mare masha langai KNG shiga dap de tsun dan ai re.

“Dai hkau na makau grup yin de sha myen hpyen dap ni shani shagu ngu na lak nak kaba gap bang taw ai, shaloi gaw mung shawa ni asak hte rang na gadai n gwi sa dan ai. Gumhpraw law law jaw na gun jang shaga na tim pyi gadai n gwi sa taw ai, dai zawn byin taw ai majaw, dai ning gaw mam lu dan n lu dan pyi n chye sai. Lama n lu dan yang gaw, du na shaning hta gaw gara hku lai di ra na re pyi n chye sai” nga tsun ai.

Lung Ja bum lagaw mayan hta hkau na Eka 800 ram nga ai lam matut chye lu ai.

Ya ten n kau lam kaba, mare hte ni ai shara hkan na mam ni hpe gaw lu dan la ai lam ni loi li nga taw sai rai tim, bum lagaw maga de na hkau na mam ni hpe tsep kawp rai n dan la lu shi ai lam matut chye lu ai.

Lai wa sai shaning ni hta mam dan manu lani mi  5,000 ram sha jaw ra ai rai tim, majan n hpan lam ni a majaw, ya ten dai ginra hta lani mi mam dan gun jang manu 8000 hte 10,000 mi lapran jaw ra tim dan na tsang ra taw ai chye lu ai.

Lai wa sai October 22 ya shani kaw na Myen hpyen dap gaw, Lung Ja bum hpe htim gasat hpang wa ai rai nna, dai ni ten du hkra laknak kaba ni jahkring hkring gap shadam bun ai lam ni nga taw ai lam chye lu ai.

Dai zawn laknak kaba gap shadam bun ai lam ni a majaw, mung mare masha ni asak si sum ai lam hte hkala n ba hkrum ai lam ni mung nga wa sai re.

Majan Shiga, Shiga

Myen asuya dap hpe Hkalum Pa kaw KIA D36 ni bawm hte hkap kapaw

Leave a comment

Tinang ginra kata ‘ginra jasan’ majan masing galaw nga ai Myen asuya dap hpe Sep. 29, bat Lahkawng Ya shani kalang bai, Hkalum Pa kaw KIA Dung 36 ni, bawm hte hkap kapaw gasat ai lam galaw ai re.

Mungbaw hte Dalung lapran Hkalum Pa kaw lai wa ai, tatmadaw Myen hpyendap, Dapnu (tat-ma) 88 hpyen hpung hpe buga ten hkying 4pm jan hta, KIA Dung 36, Kung (1) ni, bawm hte hkap dem ai re.

“Daini (Sep 29) gaw mi yat.. le… Mungbaw, Hkalum lai kaw, Dalung de yu wa ai lam kaw Dung 36, Kung 1 ni bawm bai hkap kapaw ma ai da law, hkra n hkra gaw n chye ai, Myen mung aten hkying 4:30 daram kaw re,” nga nna ginra masha langai Jinghpaw Shiga Dap de bat Lahkawng Ya shana tsun ai.

Bat Langai Ya shani hta Mungbaw grupyin shara masum kaw Myen hpyen Dapnu (88) ni hpe KIA D36 ni hkap sin gasat ai kaw, Myen maga si hkala lam nga ai hpe chye lu ai re. KIA maga hkra machyi lam n nga lam, Dapba (6) salang ni tsun ai re.

Kachin Sub-state, lahta Sammung, Wunpawng Mungdan Shanglawt Hpyendap, KIA Dapba (6), Dung (36) ginra Muse ginwang kata Myen asuya dap ni ‘ginra jasan’ majan masing galaw nga ai majaw, ndai September praw kaw nna, madung Mungbaw grupyin hta wuhpung lahkawng gasat gala majan ni byin nga ai re.

Tinang KIA dap daru de htu shadut shang wa ai Myen asuya dap ni hpe ‘ahkang n hpyi ra ai sha’ gap na ahkang jaw da ai nga nna, Jinghpaw mungdaw Ginjaw Laiza na KIO/KIA Shiga Magam Dap lithkam, Du Kaba Nhpang Naw Bu, ndai shata praw de KNG de tsun wa sai re.

Shiga

Lahta Sammung kaw Myen hte KIA gap hkat ai, mali ya du

Leave a comment

Myen asuya dap hte Wunpawng Mungdan Shanglawt Hpyendap, KIA, lapran lahta Sammung, Kutkai Ginwang, Kaleng ginra kata gasat gala lam byin nga ai gaw, June 19, bat Manga Ya, du hkra, nhtoi mali ya du sai.

Bat Manga Ya, shana maga hkying 5pm jan hta byin ai majan gaw loi laja nna aten minit 40 daram na ai hte, laknak kaba nsen ni hpe Kaleng mare kaw na pyi na lu ai nga, ginra masha ni tsun ai.

Gasat gala majan gaw KIA Dapnawng Dapdung (29) hte Myen hpyen hpung hkrum katut nna byin ai re.

“Gap hkat ai shara gaw Man Tung hte Nam Hu ni a hka la, hka baw kaw re, hpyendap kaw n re. Div. hte Dung (29) ni yen nga ai shara kaw gap hkat ai. Kaleng kaw na pyi laknak kaba nsen ni grai na ai,” KIA Dapba (4) hpyendu langai, Jinghpaw Shiga Dap, KNG, de tsun shana ai.

Kutkai a sinna maga deng 8 jan gang ai, KIA Dapba (4), Dingda Ginwang Ginjaw a Kaleng ginwang daw shara de Myen hpyen Tat-ma (88) hte (99) hpyen hpung ni shara jut masum na htu shadut wa ai majaw, KIA hte gasat gala lam ni gaw June 16 ya shana kaw nna byin wa ai re.

Ya ten Myen asuya dap hte bilateral gap hkat jahkring na jahkrup nga ten, Jinghpaw Mungdaw hte Lahta Sammung tinang KIA dap ni yawng madu hkum makawp maga hta lai nna asuya dap ni hpe sa htim gap gasat ai n galaw na matu matsun da ai re.

Ya mungkan COVID-19 ana zinli makawp ninghkap ladaw, Myen hpyendap gaw, jahten sharun hpung ngu masat ai, Rahkai AA hte byin ai majan hta lai, ngam ai rawt malan hpung ginra ma hkra kaw gasat poi jahkring ai lam hpe May (10) kaw nna August (31) du hkra galaw ai lam, ndau sai re.

Dai zawn tsun tim, Lahta Sammung nga KIA dap daju ni hpe shading nna htu shadut htim gasat ai lam ni galaw nga ai kaw, June 6-7 hta Muse ginwang kata KIA Dapba (6), Dung (9) a daju Htan Hpa Bum hpe gasat zing sai. Dai hpang, ya Kutkai, Kaleng kaw KIA dap ni hpe htu gasat nga ai re.

KIA maga tinang dap de Myen asuya dap ni, ni kahtep wa ai snr du wa jang she loili ninghkap gasat nna yen mat ai ladat galaw nga ai majaw KIA gaw ‘hpyen wa hpe atsawm n gasat ai ngu’ ginra masha ni ja ja tsun dinglung ai lam hkrum nga ai re.

Shiga

Na Hkyem KIA dap hpe Myen asuya dap wa zing, wan nat kau da

Leave a comment

June 18, bat Mali Ya jahpawt daw hkying hkum lahkawng daram gap hkat ai hpang, Myen asuya dap gaw Lahta Sammung KIA Dung (8) a Na Hkyem dap hpe wan nat jahten kau da nna bai wa mat ai lam, chye lu ai.

Ndai shara gaw, Kutkai a sinna-dingdung de Wunpawng Mungdan Shanglawt Hpyendap, KIA a Kaleng ginwang daw, Na Hkyem, Nam Hu lahta kawng kaw rai nna, aten hkying 6:30am kaw nna 8:30am du hkra gasat gala byin ai lam, KIA Dung (8) shiga lawk tsun ai re.

“Gap gasat hkat ai gaw Dung (8), Kung (1) ni hte gasat ai. Dai ni hte rau Div. ni nga ai re. Kung (1) ni na hpyendap hpe wan nat kau da ya nna bai wa mat ai,” nga nna KIA hpyendu langai tsun ai.

KIA Dapba (4), Dingda Ginwang ginjaw (Div.) du salang ni du nga ai, Kaleng ginwang daw kata Na Hkyem ginra de Myen hpyen hpung (Tat-ma 88 lawm ai) ni htu lung wa ai majaw June 16 ya shana hte June 17 ya jahpawt hta mung aten kadun hkrum katut gap hkat ai lam ni byin wa ai lam, lahta na mying n tsun mayu ai KIA hpyendu wa matut tsun ai.

COVID-19 mungkan kap bra ana zinli byin nga ai ladaw, May 10 kaw nna August 31 du hkra, jahten sharun hpung ngu masat ai, Rahkai AA hte byin ai majan hta lai, ngam ai nga shara yawng, mungdan ting madang majan jahkring tawn ai nga nna Tatmadaw Myen hpyendap ndau tawn ai re.

Raitimung, Lahta Sammung e Myen hpyendap gaw KIA dap daju ni hpe htu gasat ai lam ni galaw wa ai kaw, June praw 7 hta Muse ginwang kata KIA Dapba (6), Dung (9) a headquarter Htan Hpa Bum hpe gasat zing ai lam galaw wa sai. Dai hpang, matut manoi Kutkai ginwang kata na KIA Dapba (4), Dung (8) a Na Hkyem dap hpe gasat zing nna wan nat jahten kau da ai lam galaw ai rai nga ai.

Ya na zawn, Myen hpyendap gaw Lahta Sammung KIA dap ni langai hpang langai hpe htu gasat zing ai lam ni galaw nga tim, bilateral gap hkat jahkring na lam bawngban nga ten, asuya dap ni hpe sa htim gap ai lam n galaw na matu KIA dap ni hpe matsun da nga dingyang naw rai nga ai.

Shiga

Myen-KIA Layan Kawng kaw gap hkat

Leave a comment

N gap hkat ai loi na ten, kalang bai Myen asuya dap hte Wunpawng Mungdan Shanglawt Dap (KIA) lapran Lahta Sammung Layan Kawng kaw June 6, bat Kru Ya shana hkying 7 jan kaw nna numdaw 2-lang gap hkat wa sai hpe KIA tsun shagrin ai.

KIA Dapba (6) kata na Dapdung (9) hpyen hpung ni nga ai Muse ginwang Htan Hpa Bum, Layan Kawng de Myen hpyen hpung langai lung wa ai majaw shana gasat gala lam byin wa ai rai nga ai.

“E… dai Hu Hpyet maga kaw na lung wa ai Myen ni gaw… Shanhte Myen ni dai kaw na lung wa ai gaw dung 9 ni na ai majaw sa hkap sin taw ai kaw Myen ni shawng lung wa na dai kaw gasat poi numdaw lahkawng lang byin ai. Ya gaw bai zim taw sai” nga nna KIA Dapba (6) hpyendu langai Bat Kru Ya shana majan ngut ai hpang tsun ai re.

Myen hpyen hpung a dap mying n chye tim, ya ten dai ginra hkan e hpyen masa shamu shamawt hkawm nga ai gaw Tat-ma (88) hte (99) ni re nga nna ginra masha ni tsun ai re.

Gasat gala zim ai hpang, Myen hpyendap maga si hkala nga n nga n chye lu tim tinang KIA maga gaw kadai hpa n byin ai nga, lahta na KIA hpyendu wa tsun ai.

Mungdan kata COVID-19 mungkan ana zinli makawp ninghkap ladaw, jahten sharun hpung ngu masat ai Rahkai AA ni nga ai ginra hta lai, ngam ai amyusha rawt malan hpung ni nga ai ginra ma hkra kaw August shata htum du hkra majan jahkring tawn ai nga, May 9 nhtoi hte tatmadaw ndau tawn ai re.

Raitimung Lahta Sammung e Dingdung Daw Daphpawm hpung mali hta na, KIA jinghkap dap Balawng TNLA hte Kokang MNDAA, ni gaw Myen asuya dap a hkan tam htu gasat hkrum nga ai masa re majaw shani shagu ngu na majan byin nga ai re.

Shiga

Jahten Sharun Hpung ginra ni hta lai Majan Jahkring ai lam Myen hpyendap ndau

Leave a comment

Jahten Sharun Hpung ngu masat tawn ai wuhpung ginra ni hta lai, ngam ai shara yawng hta May 10 kaw nna August 31 du hkra majan jahkring tawn ai lam, Myen hpyendap May praw 9 hta ndau dat sai.

COVID-19 ana zinli makawp ninghkap hte tsi lajang lam hpe atsawm grak laga galaw lu na matu hte htani htana simsa lam gawgap lu na yaw shada let ya na zawn majan jahkring ai re nga, tatmadaw Dap Up Daju rung ndau hta tsun ai.

Ya ten terrorist (ningchyun shanang jahten sharun hpung) ngu masat hkrum ai gaw Rahkai Arakan Army (AA) hte Arakan Rohingya Salvation Army (ARSA) yan rai nhtawm, ndai ten hpyen majan mung Rahkai mungdaw hte Palewa, Hkang mungdaw e grai na du nga ai re.

Jinghpaw mungdaw kata AA hpe hkapla tawn ai KIO ginra ni hta ndai majan jahkring ai ndau hkan shatup na masa n nga ai re. Lai wa sai March 20 hta, AA nga ai KIO Laiza hte Mai Ja Yang mare lahkawng gasat hkrum wa na re lam, Myen hpyendap kawn KIO hpe sadi jaw ai lam nga sai.

Ndai zawn shata 3 jan majan jahkring da ai ladaw, amyusha laknak hpai hpung ni hku nna tatmadaw Dap Up Daju a simsa lam lamyan (6) hta na (4) hpe hkan sa ra na re lam shadut tawn ai.

Dai lamyan mali gaw, myit hkrum da sai ga sadi ni hte maren sadi dung na matu, simsa lam ga sadi ni ntsa amyat n htuk na matu, buga ginra mungchying mungshawa ni hpe jamjau n jaw na matu, mungdan kawn shagrin da chyalu upadi ni hpe hkapla hkan sa na matu, tsun tawn ai.

Dai hta n ga, laknak hpai hpung shada da gasat gala n galaw na hte ginra masha ni ntsa adip arip n galaw na lam, asuya uphkang dap, matut mahkai hkawm sa hkawm wa lam hte mungshawa akyu ara hpe makawp maga lit la na matu, tsun shadut tawn ai re.

Lama na ndai lam ni hpe hkan sa ai lam n nga yang, tatmadaw gaw man ang ai hku ahkyak la na re lam tsun timung, gara ladat hte ari jaw na lam gaw n sanglang tawn ai.