Hpakant Tamahkan mare hta Myen hpyen dap hte KIA dap lapran majan laja lana gap gasat hkat taw nga ai hta, Myen hpyen dap maga mung mare masha dum nta ni hpe wan nat jahten taw nga ai lam ginra masha ni tsun ai re.
Tamahkan Majan hta Myen hpyen dap maga sum machyi lam ni law taw nga ai majaw, March praw 3 ya jahpawt Hpkant maga de na Myen hpyen dap Hk.L.Y 42, Hk.L.Y 12 hte Hk.L.Y 76 dap na hpyen n-gun 80 daram Tamahkan de hpyen n-gun garum sa wa ai ten Maw Lung mare hta KIA PDF dap ni kaw na hkap shingla gasat ai hta Myen hpyen dap maga sum machyi lam law wa ai re.
Dai zawn lam lapran hta hkap shingla gasat hkrum ai Myen hpyen hpung ni gaw, Tamahkan mare de shang nna, Mare wan nat jahten ai lam galaw wa ai nga, shawng lam magam gun langai KNG shiga dap de ya na zawn tsun dan wa ai re.
“Mani kaw na mare kata Myen hpyen dap ni wan nat jahten taw nga ai, Sam Hkyeng SNA hte Pyozawhti Myen hpyen dap a masha ni re, ya Myen hpyen dap hpe gaw KIA PDF dap ni wang nna htim gasat taw nga ai dai kaw shan hte sum machyi ai lam law taw nga ai ga rai nga ai,” nga tsun dan ai re.
Ya ten Myen hpyen dap hte Sam Hkyeng SNA pawng hpawm dap ni gaw, Tamahkan mare hpe wan nat jahten taw nga ai hpyen hpung ni hpe, KIA dap maga na mung dai hpyen hpung ni hpe wang da nna, htim gasat taw nga ai majaw, Majan matut laja taw nga ai lam tsun ai re.
February 26 ya shana maga de kaw na, Tamahkan mare Myen hpyen dap hpe KIA PDF dap ni htim gasat taw nga ai gaw, dai ni ten du hkra majan laja nga ai rai nna, Tamahkan mare shara lahkawng hta majan matut byin taw nga ai re.
Myen hpyen dap maga ya na zawn mare wan nat jahten ai a majaw, mare dum nta htam 3 kaw na htam mi daram yawng hkru hten mat sai rai nna, law malawng mare ka-ang na dum nta ni re lam chye lu ai.
Tamahkan mare wan nat hkrum ai majaw, hpyen yen mung shawa nkau mare de shang nna, hka jaw sat na matu shakut wa yu ai rai tim, Myen hpyen dap maga shang na ahkang n jaw hkum pat da ai majaw, ya na zawn mare hkru hten ai re nga, ginra masha langai ndai zawn matut tsun da ai re.
“Mare Masha ni gaw mare de shang na wan sat na matu hkyen ai, dai hpe Myen hpyen dap ni gaw ahkang n jaw ai, wan sat mawdaw ni hpe mung n shang shangun ai, shang wa ai ni hpe gap na nga tsun ai, dai majaw mare masha ni gadai mung n-gwi shang ai majaw, dai hku wan hkru taw nga ai,” nga matut tsun ai re.
Myen hpyen dap maga, Tamahkan dap shara hpe n tat sum hkra February 27 ya shani kaw na dai ni ten du hkra nbungli hte laja lana wa htim gap gasat garum ya taw nga ai re.
Nhtoi bat mi jan htim gasat hkrum taw nga ai Tamahkan dap shara hpe KIA dap maga wang da let htim gasat taw nga ai majaw, shani shagu majan laja taw nga ai sha n ga, ya ten du hkra rai n lu zing madu shi ai re.
Majan a majaw, Tamahkan mung mare masha 5000 jan Hpakant ginra shara shagu de hprawng yen taw nga nna, dai hpyen yen mung shawa ni gaw, mai byin ai hku hpungkyi jawng, Naku jawng wang ni hta machyu shingbyi taw nga nna, malu masha hte laga garum ningtum lam ni ra ahkyak taw nga ai re.
