2008 gawda tara hpe gram na matu madi shadaw ai hte ninghkap ai mungshawa n gun madun lamang lahkawng hpe Myitkyina e lai wa sai bat laman shawng shani, hpang shani galaw wa sai re.
Gaw da tara yawng hpe gram na matu madi shadaw ai mung shawa 6000 jan shanglawm ai n gun madun lamang hpe August 15 ya shani galaw ai rai nna, gram na matu ninghkap ai n gun madun lamang hpe August 16 ya shani mungshawa 500 jan hte n gun madun wa ai re.
Ya shawng ningnan, 2008 gawda tara gaw ning pawt kaw nna jahtum du hkra yawng gram ra ai nga nna, gram na matu madi shadaw n gun madun lamang hta shanglawm ai mung masa yu maram Salang Naing Ko Ko ndai zawn tsun ai re.
“Shinggyim masha ni matu gawda tara byin shangun mayu yang, shinggyim masha yawng hkan sa mai ai hpe galaw ra ai. Ndai hta lawm ai tara kanu ni gaw shinggyim masha ni a sari sadang hpe shatsaw ya ai lam n nga ai sha, shagrit shanem ya ai majaw mungshawa ni matsan tsin yam hkrum sha nga ai. Dai majaw mungshawa ni lawt lu na matu ndai gawda tara hpe gram ra ai.” nga nna tsun mat wa ai re.
Gawda tara gram na madi shadaw ai n gun madun lamang hta mung shawa ni gaw ‘simsa lam a matu 2008 gawda tara gram ga’, ‘2008 gawda tara gram na lamang hkap tau la ga ai’ ngu ai gasi ni hpe Jinghpaw, Sam hte Myen laika hku hpai madun mat wa ai re.
Shanhte gaw Myitkyina Sein Mya Eya nampan sun kaw nna lam hkawm n gun madun wa nna, manau wang majoi gawk nu e hkaw tsun hpawng hte shangut da ai re.
Bai nna, Bat 5 ya shani galaw ai n gun madun poi lamang hta chyawm gaw 2008 gawda tara npu ahkyak ai tara kanu nkau hpe n gram na matu hpyi shawn da ai re.
“Aten la nna ka lajang da ai tara kanu re majaw, ndai hpe ya ten gram ai nre sha kaja byin gying ai hpe mahtang galaw na matu ra sharawng ga ai” nga nna n gun madun woi awn ai Slg. Brang Shawng tsun wa ai re.
Dai shani shanhte madung hpyi shawn ai gaw tara kanu masat 59 hpe n-gram na matu hte tara masat 261 hpe gram na matu rai nga ai.
Tara masat 59 gaw ‘mungdan gumsan magam tai na rai yang, shi a ningrum ningtau, kanu kawa, kasha ni hte shanhte hte seng ai ni gaw maigan masha n mai byin ai’ ngu ai rai nna, tara masat 261 chyawm gaw mungdaw ni a hkringmang salang daju hpe mungdan Gum san magam kaw nna a ding tawk shatsam lu ai lam rai nga ai.
Bat 4 ya shani galaw ai madi shadaw n gun madun lamang hte Bat 5 ya shani galaw ai ninghkap n gun madun lamang lahkawng tup e, Jinghpaw mungdaw mungshawa party KSPP hku nna shanglawm ai lam n nga ai hpe chye lu ai.
