Hpa majaw Rev.Dr. Hkalam Samson hte Sara Langjaw Gam Seng Myen mung de bai nhtang wa?
Myen hpyendap gaw mungdan kata hkristan ni hpe zingri zingrat galaw nga ai lam American gum san magam hpe tsun dan ai Jinghpaw Wunpawng Hkalup Hpung Ginjaw KBC ningbaw Rev.Dr. Hkalam Samson gaw Jinghpaw mung de bai du wa sai re.
August 14 ya shani Myen mung Yangon e shang wa sai rai nna, 15 ya shani gaw myitkyina de matut lung wa ai re.
Sara Samson hte Sara Langjaw Gam Seng yan hpe hkap tau ai hpung shawa ni hpe KBC rung e Sara Samson ya na zawn salang ai lam galaw mat wa ai rai nga ai.
“ka da ai hku hti na nga yang second 50 jan na re majaw n hti sai. Hpyen yen hte seng ai lam ni ka da ai. Kaga lam Myen hpyendap hpe American asuya hku nna a hkyak la ai hpe chyeju dum ai lam sa tsun ai. Hkristan makam masham wang lu wang lang n nga ai. Amyu sha bawsang rawt malan hpung ni gasat nga ai gaw Federal hte Democracy a matu re lam sa tsun ai’ nga nna Sara Samson tsun mat wa ai re.
Dai hku tsun ai majaw, Sara yan a shim lam hkrit tsang rai ai rai nna, America e aten loi na hkra shingbyi nga na matu, shing n rai America e mahtang nga mat na matu America asuya ni hpaji jaw ai raitim, tinang tsun ai ga teng man ngu hpe sakse madun mayu ai majaw bai n htang wa ai re lam Sara Samson tsun dan ai re.
Lai wa sai July 18 ya shani American gumsan magam salang Donald Trump hte hkrum ai ten, Myen hpyendap gaw Myenmung kata hkristan ni hpe roi rip zingri galaw nga ai lam, American asuya hku nna myen hpyendap hpe ari jaw ai hpe chye ju dum ai lam hte amyusha rawt malan hpung ni Myen hpyendap hpe gasat nga ai gaw Democracy hte Federal a matu re lam tsun mat wa ai re.
Ndai mabyin gaw Wunpawng Mungdan Shanglawt Hpung KIO hpe jasu ai (alarm) re nga nna mung Sara Samson matut tsun ai re.
“ngai hpa majaw Myen mung de bai wa ai nga yang, mung shawa nga ai. Mungkan nga ai. Grau nna Karai Kasang nga ai. Dai majaw KIO hku nna mung Karia hpe kam nna mung shawa hte rau galaw na a ten rai sai lam jasu dat ai re.” nga nna tsun ai re.
Jinghpaw mungdaw a hpaga rawt jat lam matu htingbu Miwa mung hte ganawn ra ai raitim, shinggyi a hkaw a hkang a matu gaw sinna mungdan hte matut mahkai ra ai hpe Miwa asuya mung chye na sai ngu kam ai lam shi matut tsun ai re.
Sara Samson gaw Jinghpaw Wunpawng Hkalup Hpung Ginjaw KBC ningbaw rai nna, ya yang hpyen yen ni dum nta wa lu hkra shakut nga ai Kachin Humanitarian Concern Committee KHCC a ningbaw mung rai nga ai.
Shi hte rau hkawm ai Sr. Langjaw Gam Seng chyawm gaw Lahta Sammung Munggu buga hpung a magam gun rai nna, 2016 munggu majan laman rawt malan hpung ni hpe garum ai ngu, Myen hpyendap mara shagun ai majaw htawng sharawng hkrum ai sara mung rai nga ai.
