Indaw de htu shadut htim gasat lung wa ai Myen hpyen Tsit Kyaung (စစ်ကြောင်း) hpung 2 hpe pawng hpawm dap maga hkap shingla gasat ai hta, Myen hpyen maga Tsit Kyaung(စစ်ကြောင်း) nawng sum wa ai lam, Indaw Rawt malan hpung maga tsun tawn ai re.
Dai Hpyen Hpung ni gaw, October praw 4 ya shani Wunto kaw na Indaw maga de htu lung wa ai Myen hpyen Dapnu 33 kata na hpyen hpung hte Hk.M.Y (331) dap na hpyen hpung ni re lam chye lu ai.
Dai Hpyen Hpung ni hpe October 20 ya shani Meza makau kaw Pawng hpawm rawt malan hpung maga hkap shingla gasat ai hta, Tsit Kyaung(စစ်ကြောင်း) nawng sum machyi hkrum wa ai lam, dai ginra na rawt malan magam gun langai KNG shiga de n dai zawn tsun dan tawn ai re.
“Indaw Ginwang Meza Lay Pyin kaw du nga ai Myen Hpyen Hpung hpe hkap shingla gasat ai kaw ram ram masan sa ai, hpyen hpung nawng si ai. Dai majaw nbungli hte agying bai wa gap sharu bun wa ma ai” nga tsun ai re.
Dai Myen Hpyen Hpung hpe Dapnu 33 kata na Ningtau Dapnu Up Dukaba ကျော်ဆန်းဝင်း woi awn ai hpyen hpung hte Hk.M.Y (331) na Dukaba မျိုးသိန်း woi awn ai hpyen hpung lahkawng re lam chye lu ai.
Dai Hpyen Hpung hpe October 25/ 26 lahkawng ya laman hkap shingla gasat kau wa lu ai mung rai nga ai.
Myen hpyen maga စစ်ကြောင်း 2 hte htim gasat lung wa ai hpe pawng hpawm maga hkap shingla gasat ai majaw, Myen hpyen marai 50 daram si nna, marai 20 jan gaw laknak jahkrat asum jaw rim hkam wa ai lam dai ginra de na magam gun ni tsun ai re.
Myen hpyen maga sum machyi law ai majaw, Nbungli hte laja lana wa gap sharu bun ai majaw, mung shawa dum n ta mare ni wan hkru hten ai lam ni nga ai hpe matut chye lu ai.
Jinghpaw Mung Mungmyit, Manmaw hpyen man ni de mung Myen hpyen dap hte Pawng hpawm maga shani shagu majan byin taw nga ai re.
