Lani Mi Laman KIA Dapba Ginra Shara Lahkawng Kaw Nbungli Bawm Sa Jahkrat Bun
Gumshem Myen Hpyen Dap Dai ni lani mi laman KIA Dapba ginra shara 2 kaw bawm wa jahkrat bun kau da ai lam, shawng lam hpyen magam gun ni kaw na chye lu ai.
Dai na maga hkying 1 daram Laiza Miwa jarit mayan kaw wa du pyen gayin nna, Miwa maga sadi jaw Wan gap shapyen ai lam galaw wa ai nga, Laiza ginra masha langai KNG Shiga de tsun ai re.
Dai hpang, dai na de hkying 3 daram ten hta mung, Uru Ginwang ginjaw ginra de mung wa pyen gayin nna, bawm jahkrat kau da ai lam nga ai hpe chye lu ai.
Dai na maga ginjaw ginra Laiza grup yin de Y12 Nbungli langai shawng pyen gayin nna, Jet Nbungli langai bai hkan pyen lung wa ai nga Laiza ginra masha langai KNG Shiga de n dai zawn tsun ai re.
“Dai na maga Nbungli hpan lahkawng re, Miwa ni mung Wan hkut mawng rai gap shalun ma ai, dai hpang Nbungli kaw na mung bawm jahkrat ma ai, madat yu yang Mung Seng Yang maga de re zawn nga, an hte mung gara de mung n gwi pru ai majaw n ta sha rawng ai,” nga tsun ai re.
Dai na maga hkying 3 aten daram hta mung, Hpakant ginra de Jet Nbungli 2, Y12 Nbungli langai wa du pyen gayin hkawm nna, shana maga hkying 3:20 aten, Dapba 9 hte Dung 6 shara ni kaw jahkrat kau da ai lam Hpakant ginra masha langai KNG de n dai zawn tsun ai re.
” Anhte Hpakant de gaw, Hkying 2 chyen daram kaw na Y12 nbungli pyen gayin sai, dai hpang hkying 3:20 kaw Dapba 9 hte Dung 6 kaw wa jahkrat kau da ai nga tsun ai, gade daram hkra hkala ai chyawm n chye ai,” nga tsun ai re.
Myen hpyen maga ya na zawn KIA ginra de nbungli bawm hkrup mara bai hkan jahkrat bun wa ai gaw, Simsa lam saw shaga ai de n sa ai majaw ya na zawn nbungli hku na hpyem masa dip n gun jaw wa ai lam re nga hpyen masa yu maram ai ni tsun ai re.
Ndai laman Hpyen masa kahtet ai majaw, jarit mayan na mung shawa ni yawng sadi maja nna, gaduk ni a tsawm htu nna shim lam hpe a tsawm sadi maja na matu tsun sadi jaw tawn ai re.
Hpyen masa a majaw, jarit mayan KIO Uphkang ginra na hpaji jawng ni hpe mung pat tawm ai lam chye lu ai re.
