Myen Hpyen Hka Sanghpawli (4 ) hpe KIA Pawng Hpawm Ni Bai Gap Jahten Kau Ya

Katha kaw na Manmaw de lai lung wa ai Myen Hpyen Hka Sanghpawli  4 the hpe KIA PDF pawng hpawm ni hkap shingla gasat kau lu ai lam, shawng lamhpyen shi sawn ni tsun ai re.

September 8 ya jahpawt Katha kaw na lung wa ai Myen hpyen hka sanghpawli 4 gaw, mana Shwegu lahta kaw wa yup hkring sa nna, dai hpawt manap Manmaw maga de bai lai lung wa ai ten hkap shingla gasat ai kaw 2 hkru mat nna, ngam ai lahkawng Manmaw de matut lai lung wa ai hpe bai hkap shingla gasat ai hta, Sin Hkan Mahkrai n pu kaw gap shalup kau ya wa lu ai lam matut tsun dan ai re.

Dai ni hkap shingla gasat ai kaw, Hka Sanghpaw 2 gaw wan hkru mat nna, ngam ai lahkawng gaw hka kaw lup mat hkra gap jahten kau wa lu ai lam chye lu ai.

Dai ni Myen hpyen hka sanghpaw hkap gasat jahten lu ai lam hte seng nna, Dukaba Nhpang Naw Bu KNG shiga de ndai zawn tsun ai re.

“Mani Katha kaw na lung wa ai hka sanghpaw ni Shwegu kaw du nna, jahkring da ma ai hpe KIA the pawng hpawm ni gap jahkru kau ya lu ma ai,” nga tsun ai re.

Dai Sanghpaw 4 hta 3 gaw hpyen gasat sanghpaw rai nna, langai gaw hpyen lang arung arai malu masha htaw ai သ့ခွန် sanghpaw re lam chye lu ai.

Hpyen gasat sanghpaw kaw na laknak kaba gap ai majaw, Moe Tar Lay Mare wan hkru ai lam nga wa ai hpe matut chye lu ai re.

Manmaw ginra de Myen hpyen dap ni hka lam hte lagaw lam hku nna, September shata praw kawn hpyen n-gun bai htu shadut jat bang ai lam galaw nga ai majaw, Shwegu, Zinbung hte Sing Hkan grup yin ni hta gasat gala majan laja lana byin nga ai lam chye lu ai re.

Myen hpyen dap ni shani shagu ngu na KIA pawng hpawm hpyen hpung ni nga ai shara de, lagaw lam hku nna htu shadut nga ai sha n-ga, drone, nbungli ni hte mung laja lana htim gasat nga ai majaw, KIA pawng hpawm hpyen hpung ni mung, ninghkap gasat nga ding yang re ai lam matut chye lu ai.