Myitkyina Shadau mare Lapran tsang jawng hta, Yama nanghpam lu sha ai jawngma grau grau law wa taw ai nga, ginra masha ni tsun ai re.
Kani Nanghpam dut ai ni gaw, Shadau mare lahta tsang jawng shingdu kaw nga let dut garan jaw taw ai majaw, tsang 8, 9 re ai jawngma ni shani shagu sa mari jai lang taw ai nga, dai ginra na mung shawa langai KNG de ndai zawn tsun ai re.
โKani dut ai ni Jawngma ni hpe Yama tsi hkyep jaw dat nna, dut shangun ai da. Jawngma ni gaw shada dut garan hkat nna, Jawng she n sa hkra hkra rai, hka kau hkan dai hku marawp hkawm taw ma ai,โ nga tsun ai re.
Jawngma ni gaw, shanhte lu ai muk jahpu hte Yama tsi hkyep sa mari la nna, hka kau shara hkan dung marawp taw ai marai 20-30 daram nga ai lam, dai ginra na mung shawa ni matut tsun ai re.
Jawng gawk de laika sharin mung n shang ai sha shani shagu Shadau Namkoi hka mayan hkan tsi hkyep marawp na hkrai nga taw ai hpe mu lu ai lam matut tsun ai re.
Tsi hkyep dut ya ai ni gaw, shan hte nan tsi hkyep dut ya ai hku n re sha, jawngma ni hpe jahpan hte hkrak tsi hkyep garan jaw dat nna, shan the shada garan dut hkat ai hku galaw shangun ai lam dai ginra na mung shawa langai mung matut tsun dan ai re.
Jawngma ni ya na zawn tsi hkyep lusha ai law wa ai majaw, jawngma ni a matu shawnglam hpaji myit tsang hpa re lam, dai ginra na lit nga ai ni tsun ai re.
Ya na zawn Jawngma ni Kani tsi hkyep lu sha taw ai lam the seng nna, lit nga ai Asuya ni kaw na mung a tsawm jep joi ya na hpe mare masha ni ra sharawng taw nga a ai re.
