Shwegu de htu lung wa taw ai Myen Hpyen hpung hpe KIA PDF dap ni lam lapran hkap shingla gasat ai hta, Myen Hpyen maga sum machyi law ai majaw, Nbungli hpan hkum bawm wa jahkrat bun taw ai lam ginra masha ni tsun ai re.
Shwegu ginra de June 15 ya jahpawt kaw na, shana hkying 8 aten daram du hkra bawm sa jahkrat bun wa ai lam, hpyen magam gun hte matut mahkai nga ai mung shawa langai KNG shiga dap de n dai zawn tsun dan ai re.
“Myen ni lagaw lam hku htu lung wa ai tsawm ra machyi sam ma ai, nbungli the ja ji bai wa nut jaw kau da ma ai, mana hkying 8 du hkra Y12 nbungli hte wa jahkrat bun ma ai” nga tsun ai.
Ya na zawn, lam lapran hkap shingla gasat taw ai rai tim, Myen Hpyen maga, madang tsaw laknak nbungli ni jai lang ai majaw, Myen Hpyen nkau Shwegu de du shang lu sai lam ni mung nga ai hpe chye lu ai.
Ya dai Shwegu kaw du nga ai Myen Hpyen ni gaw, Kawng lam, hka lam, lahkawn yan kaw na Manmaw de lung mai ai rai tim, lam lapran sum machyi lam grai law mat nna, lagaw lam hkawm na matu pyi hkrit taw sai nga, Shwegu ginra masha wa matut tsun ai re.
“Ya Shwegu de du wa ai Myen Hpyen ni mung shawa hking hking nna, htaw ra kaw majaw mi, dai kaw majaw mi rai na she mahkawng hkawm taw nga ma ai, Sanghpaw daru hte Gat, Hpaji jawng re ni hkan she lagu rawng hkawm nga ma ai, shan hte mung grai hkrit sam ma ai,” nga matut tsun ai re.
Ndai laman Myen hpyen ni Shwegu de hpyen n gun nkau du wa lu sai majaw, Manmaw de bai matut lung wa na masa nga ai lam hpe maram lu nga ai re.
Lama n dai Myen Hpyen hpung ni Manmaw maga de htu lung wa ai rai yang, lam lapran na mare ni kaw yen taw ai hpyen yen mung shawa ni gaw, kaning zawn rai bai matut yen ra na masa nga ai kun?
Ndai lam the seng na Shwegu hte Manmaw lapran kaw nga ai mung mare masha langai hpe san yu yang, ndai laman na hpyen masa hta hkan nna, hkyen shajin da ai lam gaw nga ai lam tsun ai re.
