Hpakant Namya lam lapran, marang htu kaba lam nya hten ai sha n ga, hkrai run mahkrai mung gyi ru taw ai majaw, lam lapran mawdaw tsa lam chyat taw ai nga, ginra masha ni tsun ai.
Ndai laman lai nmai mat hkra chyat ai gaw, Hkrairun mahkrai chyen mi gyi ru mat ai majaw, hkrai run the Namting mayan kaw yak taw ai lam ginra masha langai KNG de n dai zawn tsun dan ai re.
“Hkrairun mahkrai chyen mi gyi mat ai majaw, mawdaw kaba ni n mai lai mat ai shawng kaw mawdaw kaba ni pat taw yang gaw, hpang na mawdaw ni n mai lai sai le, Namting mayan chyawm gaw tsun pyi n ra ai lanam ta ten du shagu mawdaw numlai hkat she n mai hkra hkum pup nawng hkrai she byin mat ai mi,” nga tsun ai re.
Lai wa sai bat kaw na Hpakant ginra de marang shani shagu htu ai majaw, Namting mare grup yin ni hta hka kaba lam nya nna, hkawm sa hkawm wa mung shawa mawdaw lai yak taw ai hpe chye lu ai.
Hpakant lam mayan hpe lai sai Shata hta KIA maga pat da ai kaw na, Ma ni jawng lung hkawm sa hkawm wa ahkyak ten re majaw, bai hpaw dat ya ai rai nga ai.
KIA maga hpaw dat ya ai hpang, lanam ta ten du mat ai majaw, Hpakant ginra kaw gunrai manu ni grai wa yawm ai lam n nga ai nga, Hpakant ginra masha ni tsun ai.
Hpakant de shang ai Mawdaw ni hpe Myen hpyen dap Lawnghkang Bawm Yam dap kaw ladu lai san jep ai lam ni galaw nna, Myihprap Jakrai ni hpe n shalai ai majaw, Hpakant kaw gunrai n kau matut dumhprut ai lam ni byin nga ai hpe chye lu ai.
