Malaysia kaw na Myen Mung De Bai Nhtang Sa Kau Ai Hta Jinghpaw Ma Marai (3) Lawm Ai

Malaysia Mungdan kaw na Myen mung de bai sa kau ai hta, Jinghpaw ma marai 3 lawm ai lam, Malaysia na lit nga ai salang langai KNG de tsun dan ai re.

Malaysia Mungdan kaw bungli galaw nna nga taw ai Myen mung masha marai 1476 hpe rim ahkyak la nna, September 29 ya shani Malaysia mungdan Lumut Port Sanghpaw daru kaw Myen hpyendap Hka Sanghpawli kaba 3 hte sa htaw woi la mat ai rai nga ai.

Malaysia mungdan kaw mayak lam amyu myu a majaw, bungli sa galaw taw nga ai Myen mung masha marai 1476 hta Jinghpaw marai (3) lawm ai lam chye lu ai.

Dai marai 3 kaw na, langai gaw Manmaw kaw na rai nna mi, langai gaw Putao kaw na hte langai gaw gara buga na re a tsawm n chye ai langai marai (3) lawm mat ai nga, KRC Ningbaw Sumhka La Seng KNG de ndai zawn tsun dan ai re.

“Ndai kalang sa kau ai hta, anhte Jinghpaw ma marai (3) lawm ai. langai gaw Manmaw na, langai gaw Putao na Lisu re, ngam ai langai na buga gaw a tsawm n chye ai. dai masum kaw langai wa gaw UN Card pyi lu sai rai nga ai.” nga tsun ai re.

Malaysia mungdan kaw na bai n htang sa dat ai Myen mung masha ni October 4 ya shani Yangon Thilawah sanghpaw daru kaw du sai lam Myen hpyen shi laika hta n dau tawn ai re.

Malaysia asuya kawn Myen mung de bai n htang sa kau ai majaw, Myen hpyen maga, hpyen hkap rim lahkawn woi la kau na hpe sa kau hkrum ai myen mung masha ni dum n ta masha ni myit tsang taw nga ai re.

Myen hpyen dap gaw ya ten, Rahkaing hte Rohingya ni hpe laksan garan shaga la nna, san jep ai lam ni galaw taw na ai lam chye lu ai re.

Ndai kalang sa dat ai kaw Rahkaing Mung na 152 hte Rohingya 153 lawm ai lam chye lu ai. ya ten dai ni hpe Myen hpyen dap kata san jep ai lam ni matut galaw nga ai hpe chye lu ai.

Malaysia kaw du nga ai Myen mung masha law malawng gaw, tsinyam hkrum mung shawa hku hkam la nna, kaga Mungdan ni de matut lai na matu hkyen taw ai Myen mung masha ni law law rai nga ai.
Malaysia kaw tsinyam hku nna nga taw ai Myen mung masha Sen (2) daram nga ai hta, law malawng Rohingya Musalim ni re lam chye lu ai.

200,00 kaw na (110,000) ram gaw Rohingya ni rai nna kaga ngam ai 90,000 daram gaw Hkang, Jinghpaw, Karen, Myen ni re lam chye lu ai.

Malaysia Mungdan gaw, 1951 ning hta Mungkan rapdaw kaw na masat tawn ai (1951 Refugee Convention) kaw myit hkrum ta masat jun tawn ai mugndan langai rai nga ai.

Dai majaw Malaysia mungdan gaw, tinang kanu mungdan kaw mung masa lam amyu myu a majaw n mai nga mat ai zawn re tsinyam hkrum ai masha ni hpe hkap la ai mungdan rai nga ai.

Myen mungdan kata bungli tam lu tam sha yak ai majaw, Malaysia mungdan de ja gumhpraw tam ai lam hku nna sa nga mat ai ni mung law law rai nga ai.

Dai zawn Malaysia mungdan kaw bungli sa galaw let nga taw nna, tsinyam hkrum lekmat bai shawk nna, UNHCR kaw na dawdan masat ya ai hpang, No.3 mungdan langai ngai de mungdan masha hku nna, sa mai machyu nga lu ai lam rai nga ai.