Myen Hpyen Sanghpaw kaw lawm lung wa ai Hongweizar laknak kaba sai shaw la lu
Sinhkan mahkrai kaw lup mat ai sanghpaw n tsa kaw lawm lung wa ai Laknak kaba 122 MM gap ai Hongweizar laknak kaba shaw la lu ai lam, shawng lam hpyen magam gun ni kaw na chye lu ai e.
Lai wa sai August shata kaw Mandalay na lung wa ai Myen hpyen Hka Sanghpawli 20 daram hpe KIA hte pawng hpawm maga gap jahten kau wa lu ai rai nga ai.
Dai zawn Sanghpaw 20 daram gap jahten kau lu ai hta, Sinhkan mahkrai n pu kaw gap jahten kau lu ai sanghpaw kaw lawm ai laknak kaba gap sinat hpe a kaja sha bai shaw la lu ai lam Shawnglam hpyem magam gun langai ndai zawn tsun ai re.
“Bawng masha ni kaw na jep shapraw la lu ai ga rai nga ai, gara sanghpaw kaw hpa baw ni lawm ai ngu, lu rim ai bawng masha ni tsun dan ai majaw, bai tam yu yang mu nna, ga kanaw mawdaw kaba hte gang garawt shaw la ai ga rai nga ai. akaja sha gaw naw re, gap gaw rai n gap chyam yu shi na re,” nga tsun ai.
Mandalay kaw na lung wa ai Myen Hpyen Hkasanghpaw 20 jan kaw na lam lapran ချောဆွဲ la ai hte rai yang 30 jan dang Manmaw de lai lung wa ai hpe KIA Pawng hpawm maga na Sanghpaw 20 daram hpe gap jahten kau ya lu ai lam KIO Shiga lawk ni hta tsun tawn ai re.
Gap jahten lu ai Sanghpaw ni hta Mung Shawa sanghpaw ni mung lawm mat ai majaw Myit n pyaw lawm ai lam, KIC Ningbaw Malai (1) Dukaba Sumlut Gun Maw Shi a Facebook hta tsun da ai re.
Dai ning Mandalay na lung wa ai Myen Hpyen Hka sanghpawli law malawng hpe Sinhkan mahkrai n pu Ubat Gumlai shara kaw gap jahten kau wa lu ai mung rai nga ai.
KIA hte PDF pawng hpawng maga lam lapran hkap shingla gasat nga ai lapran na lai lung mat ai sanghpaw 7 Manmaw du ai hpang, KIA ni nga ai maga htim gasat ai lam ni bai galaw wa ai majaw, Manmaw kata kaw majan matut byin nga ai mung rai nga ai.
