Dai hpawt manap Hkying 9 aten daram kaw, KIA maga gap bun ai laknak kaba si Shwegu Hk.L.Y (56) Dap shawng kaw wa hkrat bun ai hpang, Myen hpyen ni shani tup laknak kaba gap bun ai nga, Shwegu mung shawa ni tsun ai re.
Dai na maga de hkying 2 aen daram hta gara maga na gap ai re n chye ai laknak kaba si langai ပင်စင်ကုန်း lawk kaw wa hkrat ai majaw, Mung shawa amyu shayi langai hkala sawng hkrum wa ai lam ginra masha langai KNG shiga de n dai zawn tsun shana wa ai re.
“Dai hpawt hkying 9 ram kaw gaw, Shanglawt maga na gap dat ai amyawk langai Shwegu (56) Dap shawng kaw wa ai, dap kata de gaw n re, dap shawng na hkaraw kaw ang ai, dai hpang Myen ni shani tup laknak kaba gap ai, Myo ting gadu na gat dut ai masha pyi n nga ai, dai ni gaw,” nga tsun ai re.
Dai na de hkying 5 chyen daram ten du hkra Shwegu muklum n tsa Jet Nbungli pyen gayin nga ding yang re la, ginra masha wa matut tsun ai.
Shwegu muklum kata lai wa sai ten, laknak n sen loi li na ai rai tim, dai ni na zawn nga gadu ai hpe nna ga yu ai majaw, lam de gat dut ai masha n nga mat ai daram re lam matut tsun ai.
Shwegu mare shinggan kaw majan laja lana gasat poi byin taw ai rai tim, Shwegu muklum kata gaw, dai ni ngoi dik re lam ginra masha wa tsun ai re.
Shwegu ginra , Si Tar maga de laja dik byin ai rai nna, shani shagu nbungli hpan hkum kaw na bawm wa jahkrat bun nga ai lam chye lu ai.
Lawu ga de na lung wa ai Myen hpyen ni gaw, ya ten Manmaw de man yawng nna, hka lam mayan na KIA PDF dap ni hpe htim gasat taw nga ai mung rai nga ai.
Shwegu muklum kata de nan gaw majan n byin tim lahkawng maga laknak kaba gap shadam bun hkat taw ai masa re lam chye lu ai.
Shwegu ginra kata na mung shawa ni gaw, hka zinlawng zawn re kaw wa ang ai majaw, hprawng na matu mung yak, kaning n di hprawng shara nnga na muklum kata kaw mai byin ai hku nga taw ai zawn, n kau gaw rai ni hkyen shajin nna, ten tup maja let nga taw ai masa re lam matut chye lu ai.
Myen ni Katha, Indaw, Mawlu ni hpe gasat zing madu kau ngut ai hpang, Shwegu maga de laja lana bai htim gasat taw nga ai gaw, ya shata mi jan na wa sai re.
