Hpakant Myen Hpyen Tatma kawng na N-gun madun ai maga de laknak kaba gap bun

Hpakant kaw, Hpawmi Aung San Su Kyi a Shangai nhtoi lamang hku n-gun madun poi lamang galaw nga ai maga de man yawng nna, Myen Hpyen Tatma kawng na laknak kaba gap bun ai majaw, Mung Shawa marai 2 Hkala sawng hkrum wa ai lam chye lu ai.

Dai ni June 19 ya shani ka-ang hkying 12 aten daram hta Hpakant Byuha kawng kaw na gap dat ai laknak kaba si Sengtawng mare lawk (3) na mawdaw gram seng kaw wa hkrat ang ai majaw, dai kaw bungli galaw nga ai La lahkawng hkala sawng hkrum wa ai nga, dai ginra na mung shawa langai KNG shiga dap de n dai zawn tsun dan ai re.

“Dai ni hkying 12 ram kaw re, Hpakant Byuha kawng na gap dat ai laknak kaba si Sengtawng lawk 3 na Asia Auto Car Workshop kaw wa hkrat ai majaw, dai kaw bungli galaw nga ai La lahkawng hkala hkrum ai, langai gaw n chyang kaw tsawm ra hkra hkala ai, langai gaw lahpa the shingma kaw hkra ai,” nga tsun dan ai re.

Hpakant kaw ndai laman Majan byin ai lam nnga tim, Myen Hpyen maga Aung San Su Kyi Shangai nhtoi lamang galaw ai ngu tak maram nna, n-gun madun poi lamang galaw ai shara maga de shading na gap bun ai lam re nga ginra masha ni matut tsun ai.

Myen hpyen ni shading na gap ai Maw Le (မှော်လှည့်) n-gun madun hpung ni hpe hkra ai lam n nga ai sha kaga mung shawa ni hkra hkala hkrum ai lam rai nga ai.

Dai hkala hkrum marai lahkawng kaw na langai gaw, tsang ra ai madang kaw nga ai lam kaga ginra masha langai mung KNG de n dai zawn matut tsun ai re.

“Marai 2 hkra mat ai kaw na langai gaw hkala sawng ai, langai gaw hpa nau n ra ai hkyam sa ai, langai wa gaw tsang ra na madang rai taw ai,” nga tsun ai.

Gumshem Myen Hpyen dap daru magam zing kau ai hpang, Hpakant ginra hta မှော်လှည့် သပိတ် wuhpung ni woi awn nna, n-gun madun ai lam hpe ding yang galaw wa ai rai nga ai.

Dai ni mung Mungdan hpaji jaw Hpawmi Aung San Su Kyi a Shangai nhtoi shani hku na N-gun madun poi galaw ai hpe Myen hpyen dap maga ya na zawn laknak kaba hte gap jahkrit wa ai lam mung rai nga ai.

Hpawmi Aung San Su Kyi shangai nhtoi 81 ning hpring ai lamang hpe Hpakant ginra masha ni Sengtawng mare kaw galaw wa ai rai nga ai.

Dai ni n-gun madun poi lamang galaw ai hta, Hpawmi Aung San Su Kyi a matu sha n ga, Mali Nmai Zup madim masing hpe mung tsep kawp jahkring kau ya na matu mung hpyi shawn wa ai hpe mu lu nga ai re.