Tamahkan Hawng Pa mare kaw Ja htu nga ai lam gaw, lam galaw na matu ginra masha ni jahtu lauban hpe lamu ga dut ya nna, htu ai re nga, dai ginra na lit nga ai ni tsun ai re.
Hawngpa mare kaw ja htu taw nga ai gaw, buga gaw sharawt magam bungli hta jai lang na matu, dai mare na lit nga ai mare salang hte mare masha ni yawng jawm myit hkrum nna, ja htu lauban ni hpe lamu ga dut ya nna htu shangun ai re lam, ginra amyu shayi langai KNG shiga de n dai zawn tsun dan ai re.
“Ya dai line n tsa kaw pru wa ai hku n re. Mare masha yawng jawm myit hkrum nna htu shangun ai she re. htu kau ai shara ni hpe bai ka-put jahpring ya nna, mare n hten hkra bai galaw na matu re. Ya Ja htu shangun ai ngu mung, mare lam galaw ra ai majaw, mare myitsu kanu kawa ni the mung shawa ni a tsawm sha bawn jahkrup na galaw ai bunli lam she re.” nga tsun ai.
Hawngpa mare gaw, lai wa sai 2023 ning kaw na majan byin wa ai majaw, mung mare masha n kau tinang man ang ai shara ni de hprawng yen ai mare kahtawng langai mung rai nga ai.
Dai mare gaw, Sam amyu bawsang law malawng nga ai mare kahtawng rai nna, SNA maga de tsap ai Sam nkau nga ai rai nna, dai mung shawa ni dai ni ten du hkra mare de rai n wa shi ai lam chye lu ai.
Hawngpa mare kata de ja htu ai lam the seng nna, lai wa sai bat hta, အောင်ဇော်မိုး ဖားကန့် mying ai Facebook n tsa hta, mare kata, Hpaji jawng ni de du hkra ja htu taw ai lam tsun da ai re.
Mare kata ja htu ai masa lam the seng na dai ginra na lit nga ai KIO Salang Kaba hpe KNG maga san yu yang ndai zawn nga tsun ai re.
“Dai kaw Ja htu ai gaw Mare Buga gaw sharawt na matu chyawm gaw re, mare lam hpe Concrete lam nyep na matu mare buga masha ni nan Ja htu lauban ni hpe dut ya nna, htu ai she re, htu ngut jang atsawm bai kaput da ya na ngu ai myit hkrum lam jawm la nna, galaw ai she re, dai kaw gara gadai Salang kaba ma n lawm ai, shan hte lauban ni hte mare masha ni hkrai jawm galaw ai bungli she re.” nga tsun ai.
Ya Ja htu kau sai mare makau grup yin na lamu ga ni hpe bai kaput shara ai lam ni galaw taw ai hpe chye lu ai.
Ya na zawn mare kata de du hkra htu sha wa ai lam hte seng nna, Hpakant ginra na masa lam hpe kungkyang ai salang langai gaw, ahkang aya lu ai ni jahkrat da ai masing hpe mung shawa ni a n tsa laba ka-up nna, atit anang hkraw shangun ai masa lam ni mai byin ai nga, n dai zawn matut tsun da ai re.
“tsun ga yang, Asuya masing jahkrat da ai lam hpe buga gaw sharawt galu kaba lam re ngu mare masha yawng hpe ta masat sa htu shangun rai, atit anang myit hkrum shangun ai lam ni anhte kata kaw law law byin lai wa sai le. Ya mung Hawngpa mare na masa gaw dai the gade n shai na re, ngai na mu mada lam le i,” nga tsun ai re.
Ja htu kau ngut sai lamu ga ni hpe bai gaput nna, hpun hkai mare de ai rai yang, dai mare buga gaw, kaning zawn rai byin wa mai ai kun? Kaji kawoi ban prat law law kaw na galaw sha hkrat wa ai lamu ga ni gaw, kaning zawn rai byin mat mai nga ai kun? Lamu ga makawp maga lam hta shakut nga ai Salang langai KNG shiga de n dai zawn tsun hpaji jaw da ai re.
Hawng Pa mare gaw, Sezin hte Gwihka mare lapran na mare kahtawng langai rai nna, Tamahkan kaw na Sengke hte sa yang Minute 15 daram sha sa ra ai mare re lam chye lu ai.
Dai mare gaw, Sam hpunau ni law malawng nga ai mare kahtawng langai rai nna, Majan n hpan lam a majaw, dai mare na Sam hpunau n kau tinang mare de rai n gwi wa ai lam ni mung nga taw ai hpe matut sagawn chye lu ai re.
Ya na zawn mare lamu ga ni hpe ja htu kau ngut ai hpang, mare bai de na ngu ai lam gaw, shingra tara yawng hten za mat ai hpang gaw, masha langai sak hkrung nga pra lam ni hpe hkra machyi wa shangun mai ai re majaw, byin mai yang dai zawn mare jahten ai lam hpe n galaw yang gaw kaja dik re nga, Hpaji munu ni tsun madi madun da ai re.
Wunpawng lamu ga hta shaning na na mai pra ai hkai rem ladat ni hte nga pra hkrat wa ai kaw, ya na zawn ja htu kau ai rai yang, jahkring mi laman na matu gaw, gumhpraw gan lu ai rai tim, shaning na na matut nga pra na matu gaw grai yak hkak wa mai ai lam, Shingra tara makawp maga lam hta shakut nga ai Sara Shaba gaw shi a mu mada lam hpe n dai zawn tsun ai re.
“Mare buga hkan gaw, mi kaw na nga taw ai yisun hkauna galaw let kanbau taw ai gaw, gumhpraw n lu ai rai tim, myit shim lum lam ni lu ai, ya ja htu kau jang gaw, gara kaw pra na gara kaw hpa galaw sha na nga na ngu ai aten galu na hpe myit yu na chye sak hkrung ra ai nga,” tsun madi madun da ai re.
Hawngpa mare gaw, Sezin hte Tamahkan mare lapan na mare kahtawng langai rai nna, Tamahkan kaw na Hawngpa de sa yang, Sengke hte Minute 15 daram sha sa ra ai shara re lam chye lu ai.
