Majan byin ai lam n nga tim Myen hpyen dap maga Waimaw Wa Shawng hte Deng 13 shara ni hta nbungli bawm wa jahkrat bun wa ai nga ginra masha langai KNG de tsun dan wa ai re.
November 26 ya shana maga hkying 3minute 10 ten hta Chihpwi lam numbraw hte Washawng hka madim kaw nbungli 2 the bawm wa jahkrat bun kau da ai nga ginra masha langai KNG de tsun dan wa ai re.
“Mana de hkying 3 ram hta Wa Shawng Hka madim rung ding sa the, Chihpwi lam numbraw 13 Kilometer shara lahkawng kaw nbungli bawm wa jahkrat bun kau da ai, masha chyawm hpa n ra ai,nbungli 2 re. langai gaw kaba ai, langai wa gaw loi kaji na grai lawan ai baw re,” nga tsun ai re.
Dai ginra na mung shawa yawng hprawng yen ma sai majaw, mung shawa gadai mung hkra hkala ai lam n nga ai hpe chye lu ai.
Ndai laman Myen hpyen dap ni htu shadut lung wa ai lam ni nga ai hpe KIA dap maga hkap shingla gasat ai majaw Myen hpyen dap ni bai hting nut yu mat ai lam nga ai hpe sagawn chye lu ai.
Ya ten Washawng Muk Chyik mare nkau ni hta mung shawa ni hkau hting hkau na galaw sha let wa nga taw sai mung shawa n kau nga ai rai tim, law malawng gaw hpyen yen dabang ni hta hprawng yen taw nga ai re.
November 25 ya shana hta mung Nam Wa mare makau grup yin ni de laknak kaba gap shadam bun ai lam ni nga wa ai re.
Waimaw ginra hta Ndai laman Myen hpyen dap ni hpyen shamu shamawt ai lam ni galaw wa ai majaw, majan byin ai lam n nga tim, shana shagu laknak kaba gap shadam bun nga ai re.
Lamyang the Wuyan mare ni hta mung hkawm sa hkawm wa mung shawa ni hpe ladu lai san jep nna, shan the n tsen n hten ai mung shawa ni hpe rim jep ai lam ni galaw taw nga ai nga, ginra masha ni tsun ai re.
Kanpaiti mare hpe htim gasat zing kau ngut ai hpang Waimaw de majan bai byin wa na masa nga ai majaw Myen hpyen dap maga ya na zawn hpyen shamu shamawt lam ni bai galaw wa ai masa re nga ginra masha ni tsun maram taw nga ai re.
