Waimaw (58) Myen hpyen dap kaw na laknak kaba majoi gap shadam bun nga

Majan byin ai lam n nga timWaimaw Myen hpyen dap kaw na laknak kaba ding yang gap shadam bun taw ai nga ginra masha ni tsun dan wa ai re.

Mana November 25 ya shana hkying 9 aten kaw na Nam Wa mare na mung shawa ni hprawng yen nga ai hpyen yen dabang maga de laknak kaba gap bun wa ai nga hpyen yen mung shawa langai KNG de tsun dan wa ai re.

“Mana hkying 9 hkying 10 daram hta anhte Nam Wa mare ni hprawng yen nga ai shara de laknak kaba majoi gap shadam bun wa ma ai, hkra hkala ai lam chyawm hpa n nga ai, rai tim hpyen yen mung shawa ni re majaw hkrit ai ga rai nga ai,” nga tsun ai re.

Nam Wa hpyen yen mung shawa ni nga ai makau wa hkrat ai rai tim, mung shawa ni gadai hpa n ra ai lam chye lu ai.

Ndai laman Waimaw ginwang kata hta majan byin ai lam n nga tim, shana shagu ngu na Myen hpyen dap ni laknak kaba bai gap shadam bun taw nga ai re.

Waimaw ginwang hpe KIA dap ni wang da nna, makau grup yin yawng hta KIA pawng hpawm dap ni shara la da sai nga shawng lam magam gun ni tsun ai re.

Ya na zawn KIA maga hpyen shamu shamawt wa ai hpe Myen hpyen dap ni hkrup mara laknak kaba gap shadam bun taw ai mung rai nga ai.