Waimaw Chihpwi Pang Wah lam ding yang, lai wa sai shata htum maga na marang htu kaba wa ai majaw, bum gyi lam gyi ru mat ai majaw, ndai laman Mawdaw sengke tsep kawp hkawm sa n mai mat sai lam ginra masha ni kaw na chye lu ai.
Dai ni ten du hkra marang matut htu kaba taw nga ai majaw, lam gram na mung n mai nna, dai hku matut na naw yak hkak taw nga ai nga, Chihpwi ginra masha ni KNG shiga dap de tsun ai re.
“Ya gaw tsep kawp lai n mai mat sai, galoi she bai lam hpaw na kun mung n chye sai, marang mung n hpawng hkraw ai, lam jasan na mung n loi shi ai, ya mahkrai yawng hten ai ai lam gyi ru ai ni hpe bai byeng rai yang gaw, bat lahkawng, shata mi daram gaw na na masa nga ai,” nga tsun ai.
Ya ten dai lam mayan de mahkrai n kau daw taw nga ai majaw, dai mahkrai ni hpe mung rai nlu gram lajang shi ai sha n ga, ga gyi kaput taw nga ai ni hpe mung rai n lu jasan shi ai re.
Mahkrai daw hten taw nga ai ni hte lam gyi ru taw ai ni hpe jasan kau lu na matu yawm dik aten bat lahkawng daram la na gram ra na masa nga ai lam ginra masha ni matut tsun maram da ai re.
Dai zawn sha Putao lam maga de mung mahkrai hten lam gyi ru ma ai majaw, hkrun lam hkawm sa hkawm wa n mai yak hkak taw nga ai re.
Ya ten Jinghpaw mung dingdung daw maga ni de mawdaw lam kaba ni yawng hten taw nga ai majaw, dai ginra ni de malu masha hte laga mung shawa lang arung arai hte jak sau ni dumhprut wa na masa nga taw ai re.
