Hpakant Uru Hka Kaba wa ai majaw, Mahkrai 2 hte hpawn, hka kau mayan na mung shawa dum n’ta 20 daram yawng lawm mat ai ngai dai ginra na mung shawa ni tsun ai re.
Ya hten mat ai Mahkrai lahkawng gaw, Lunghkang hte Mazup yang mare hpe matut da ai Mazup Yang hpri mahkrai, San Hka hte Maden Yang Ginsi mare ni hpe matut da ai San Hka hpri Mahkrai ni rai nna, ya ten dai ginra na mung shawa ni hkawm sa hkawm wa lam ni hta yak hkak taw nga ai nga dai ginra na mung shawa langai KNG shiga dap de ndai zawn tsun dan ai re.
“Mana maga de loi hkan yu ai lam mahkrai ni tssawm ra hten mat sai, mahkrai ni nga yang mung lai n mai mat sai, hka kau maga de na nta n kau gaw hka de lawm mat sai ga rai nga ai,” nga tsun ai.
Dai ning Uru hka kaba wa ai gaw, shawoi shaning hkan na hta grau kaba jat ai majaw, Hka kau na sau seng kaba langai hte dum n’ta 20 daram, Landcruser mawdaw 5 hka kaba ai hta yawng lawm hkrum wa sai re.
Lai wa sai June 29 ya shani kaw na Hpakant de shani shana marang htu kaba ai kaw na, Hka tung wa ai gaw, lamu ga nem ai shara de na mung shawa hkying lam hka hpyen hkrum sha taw nga nna, hka hpyen hkrum nga ai mung shawa ni hta hkyak hkyak malu masha hte lu hka san ni ra ahkyak taw nga ai re.
Hpakant Hka kaba hkrum ai shara ni gaw, Maden Yang, San Hka, Mazup Yang, Lung Hkang, Hpakant Myoma, Ngapyaw taw, Mashi Kahtawng ni hta grau na lim taw nga ai re.
