Manwin KIA Shagyit Hpe Myen Hpyen Dap N-gun Kaba Hte Htu Shadut Na Wan Nat Jahten Kau Ya
Chihpwi Lam, Manwin mare hta dung ai KIA Shagyit hpe Myen hpyen dap ni hpyen n-gun kaba hte htu shadut htim gasat wa ai majaw, KIA dap maga na gan yen kau da ai hpe Myen hpyen dap ni wan nat jahten kau ya sai lam chye lu ai.
Myitkyina hte Chihpwi lam lapran hkawm sa hkawm wa mung shawa ni hpe san jep taw nga ai Manwin KIA shagyit hpe April 19 ya shani hpyen n-gun kaba hte htu shadut wa ai majaw, aten gadun mi gap gasat hkat wa ai hpang, Myen hpyen dap hte n’gun n bung ai majaw, KIA dap maga yen mat ai hpang, dai shagyit hpe Myen hpyen dap ni wan nat jahten kau ya sai re lam Chihpwi ginra masha langai KNG shiga dap de tsun dan wa ai re.
“Manwin hte Sailaw lapran kaw gap hkat ai, KIA ni nga ai Manwin shagyit makau de hpyen n’gun kaba hte htu shadut wa ai, KIA maga hpa n’gun mung n nga a majaw, jahkring gap na yen kau da ai, dai hpe Myen ni gaw wan nat jahten kau ya ai,” nga tsun ai re.
April 19 ya jahpawt hkying 10 daram hta Myen hpyen dap hte Pyithutsit pawng hpawm hpyen n-gun 100 jan hte Chihpwi, Pang Wa maga de htu shadut lung wa ai hta, Sai Law hte Man Win lapran gap gasat hkat wa ai rai nga ai.
Gap gasat hkat ai hta, KIA dap maga hpyen n-gun 10 daram sha nga ai majaw, lahkawng maga jahkring gap gasat ai hpang, KIA dap maga yen kau da ya ai re nga matut tsun dan wa ai re.
Mawdaw kaba 3 hte lung wa ai Myen hpyen hpung ni gaw, Man Win makau gap gasat ngut ai hpang, Chighpwi Pang Wa maga de bai matut lung mat ai hpe yu yang, hpyen n-gun wa sa ai masa re nga ginra masha ni tsun ai re.
Hpyen n-gun wa sa na bai yu wa ai Mawdaw 3 hpe April 19 ya shana maga lam lapran hkap shingla gasat dat ai hta, Mawdaw langai yawng hkru hten mat ai re lam matut chye lu ai.
Ngam ai hpyen maw daw lahkawng gaw, Wuyan Pyithutsit dap de shang mat ai re nga tsun dan ai re.
Myen hpyen mawdaw hpe hkap shingla gasat ai hta, Waimaw 58 dap na laknak kaba gap bun wa ai majaw, Mukchyik mare na mung mare masha ni dai shana jang nan hprawng yen wa ra ai re.
Ya ten, Mali hka sinhpraw hkran ginra ni de Myen hpyen dap hte KIA dap hpyen masa shaja hkat taw nga ai rai nna, ndai laman dai ginra ni de majan laja wa na masa nga ai lam, ginra masha ni tsun maram taw nga ai re.
