Myitkyina Ake hte Hparaw mare lapran dai hpawt manap jau hkying 5 daram hta Myen hpyen dap hte KIA KPDF dap lapran majan gap gasat wa ai hpang, laknak kaba a majaw, mung shawa dum nta lahkawng wan hkru hten mat ai lam chye lu ai.
March 28 ya jahpawt jau hkying 5 daram hta KIA Dung 11 KPDF pawng hpawm dap ni hte Myen hpyen dap lapran gap gasat hkat wa ai lam dai ginra na mung shawa langai KNG shiga dap de tsun dan wa ai re.
“Dai hpawt manap hkying 5 ram hta Minute 10 dang Hparaw hte Ake lapran kaw ang katut gap gasat hkat ma ai, dai hpang hkying 11 chyen daram hta, Myen dap maga de bai gap shatsang rai ma ai, sinat kaba langai mi anhte mare kata wa hkrat na, nta lahkawng wan hkru hkrum wa ai, amyu shayi lahkawng mung hkala hkrum wa ai,” nga tsun dan ai re.
Laknak kaba wa hkrat ai majaw, dai nta madu jan hte laga hting bu kaw na sa chyai ai amyu shayi langai hkala hkrum wa nna, dai hkala hkrum ai yan hpe garum kahtau mawdaw hte mung shawa tsi rung de htaw sa da sai lam chye lu ai.
KIA dap maga de na gap ai laknak ngu maram lu ai laknak kaba si lahkawng hta, langai gaw Ake Myen dap kaw wa hkrat ang nna, langai gaw dai Myen dap lai nna mung shawa nta hta wa hkrat ang ai lam ginra masha ni matut tsun dan wa ai re.
Laknak kaba hkrat bun ai hpang, Myen hpyen dap maga, Holicopter nbungli langai hte dai mare makau grup yin ni hta pyen gayin hkawm taw nga ai lam matut chye lu ai re.
Ya ten Ake mare makau grup yin na mung mare masha ni gaw, tinang mare dum nta hta sha mai byin ai hku ga gaduk htu nna, sadi maja taw nga ma re.
Lai was ai bat ni hta mung Ake hte Hparaw mare lapran gap gasat hkat ai lam ni nga wa ai re hpe chye lu ai.
