Putao kaw Myen Hpyen dap ni hkan rim da ai, Wifi Starlink Jak ni hpe Ra lata poi ngut ai hpang she bai jaw na lam tsun ai nga, Putao ginra masha ni kaw na chye lu ai.
Lai Wa sai December praw 8 ya shani kaw na Putao ginra hta hpaw tawn ai Wifi Starlink Jak 60 jan hpe Myen Hpyen dap hkan rim kau ya ai rai nga ai.
Myen hpyen dap Starlink jak rim kau ya ai hpang, n kau gumhpraw jaw nna sa shaw ai rai tim, n shaw shangun ai sha, Ra lata poi ngut ai hpang she bai jaw na ngu sha tsun dat ai lam ginra masha langai KNG de n dai zawn tsun dan ai re.
“Nkau gaw gumhpraw the sa shaw ma ai, rai tim n shaw shangun ai, gade mi jaw jaw n shaw ya ai, Ra lata poi ngut ai hpang she sa la mu ngu bai tsun dat ai,” nga ginra masha langai KNG de tsun ai re.
Putao ginra hta Myen hpyen dap kaw na Starlink jak hkan rim kau ya ai majaw, matut mahkai lam ni bai yak hkak mat sai lam ginra masha ni tsun ai re.
Myen Hpyen dap gaw, Putao ginra hta Sarlink Wifi jak hte KIA PDF ni hpe matut mahkai Shiga jaw ai ngu n tsen n hten ai hte Wifi jak hkan rim kau ya ai re nga ginra masha ni tsun maram tawn ai re.