Monyin ginra kata na, Samhkyeng Pyitutsit shagyit shara masum hta, hkawn kang , laja lana hta sha taw nga ai majaw, madaw sengke hte gunrai htaw dut sha nga ai, sengke la ni mayak byin hkrum nga ai hpe chye lu ai.
Monyin kaw nna, Danai Jamaw de du hkra lam lapran hpyendap shagyit yawng 20 jan nga ai rai nna, dai kaw sawng dik htim gaw SNA hpyendap shagyit ni re lam gunrai htaw ai Sengke la ni tsun ai re.
“Anhte gaw Mawdaw hkawm sa yak ai majaw, Sengke hte mai byin ai hku na gat rai htaw dut ai, Kerry galaw ai, gate grai law wa ai majaw, n kaik ai, gara hku galaw sha na re pyi n chye wa sai,” nga tsun ai re.
Hkawn kang ladu lai hkap hta sha taw nga ai , SNA hpyendap shagyit ni gaw, Sahmaw mare Pyun Tung Lung mare shagyit, Pin-baw , Mogaung shangwa lam n-maw na , SNA hpyendap shagyit ni re lam chye lu ai.
Dai shagyit ni hta shawoi , Myen gumhpraw lap hking 5000 ram jaw bang ra ai rai nna, ya ndai hpang e gaw, lap 20000 du hkra , ladu lai hpyi sha taw nga ai hpe tsun dan ai re.
Laga hpyendap shagyit ni hta gaw, lap hking 5000 ram hte tsun jahkrup la mai ai raitim, dai shagyit ni kaw gaw , shanhte hpyi ai daram jaw bang ya ra ai hpe chye lu ai re.
Hkawn kang ladu lai hta sha ai mabyin ni a majaw , Sengke hte dang di ai daram gunrai htaw shalai sha ai , keri la ni gaw , mayak byin hkrum nga ai hpe tsundan wa ai re.
