Namma Balik dap hpe KPDF dap ni sa gap gasat ai hta dai kaw nga ai Balik ni hkra hkala ai lam hkrum wa ai nga, dai kaw na ginra masha ni tsun ai re.
Namma Balik dap hpe KPDF dap ni laknak kaba sa gap bun ai hpang, lahkawng maga sinat kaji ni hte gap gasat hkat wa ai majaw, aten gadun lamang lahkawng maga gasat gala lam nga wa ai hpe chye lu ai.
Mani Hpawt hkying 7 kaw PDF pawng hpawm dap ni Balik dap hpe laknak kaba sa gap bun dat ai hpang Myen Hpyen dap maga na mung laknak kaba bai gap bun wa ai majaw, hkying hkum chyen mi ram lahkawng maga gap hkat ai hpang bai zim mat ai lam ginra masha langai KNG shiga dap de tsun dan da ai re.
“Mani Hpawt PDF dap maga na ni shawng Drone bawm sa jahkrat bun sam ma ai, laknak kaba 10 lang ram ngoi wa ai hpang, sinat kaji hte bai gap gasat hkat wa ai, sinat ngoi ai hkying hkum mi ram gaw n du ai, Jahkring ngut ai hte bai zim mat ma ai,” nga tsun ai re.
KIA hte KPDF dap ni Mawdaw kaba 3 the kalang dat shang wa na laknak kaba the wa gap bun ai majaw, Balik maga si hkala ai lam nga ai rai tim, gade ram gara hku sum machyi ai ngu hpe gaw a tsawm tup hkrak n chye lu ai re.
Pawng pawm dap maga na Drone the shawng bawm jahkrat bun ngut ai hpang she lagaw dap hte bai htim ai majaw, Myen hpyen dap maga hkra machyi law ai lam ginra masha wa matut tsun dan ai re.
KIA hte pawng hpawm dap maga Namma mare kaw na bai hting nut mat ai hpang, Namma amyawk dap Hopin Myawk dap hkan na laknak kaba ni gap shadam bun ai lam ni nga wa ai hpe chye lu ai.
Ndai laman Myen Hpyen dap the Sam Hkyeng SNA dap ni Wan leng lam mayan hpyen shamu shamawt ai lam ni grai bai galaw wa ai majaw, KIA maga jahkrit sharim ai hku na sa gap bun ai rai na masa nga ai nga, ginra masha ni tsun maram da ai re.
Ya ten Sam Hkyeng SNA ni mung mare masha ni hpe atit anang hpyen rim lahkawn woi la nna, Hpyen rang rut dabang de atit anang sa ai lam ni galaw taw ai lam chye lu ai.